തമിഴ്നാട്ടിലെ കര്ഷകര്ക്ക് ആശ്വാസമായി സേലത്തെ മേട്ടൂര് അണക്കെട്ടിന്റെ ഷട്ടറുകള് തുറന്നു. മുഖ്യമന്ത്രി സി. ജോസഫ് വിജയ് ആണ് അണക്കെട്ടിന്റെ ഷട്ടറുകള് തുറന്നത്. പ്രതിദിനം 10,000 മുതല് 12,000 വരെ ക്യുസെക്സ് ജലമാണ് തുറന്നുവിടുന്നത്. 45 ദിവസത്തേക്ക് തുടരുന്ന ഈ ജലസേചനത്തിലൂടെ 13 ജില്ലകളിലായി ഏകദേശം 8 ലക്ഷത്തോളം ഏക്കര് സ്ഥലത്തെ കൃഷിക്ക് വെള്ളം ലഭിക്കും.
സാധാരണയായി എല്ലാ വര്ഷവും ജൂണ് മാസത്തിലാണ് കാര്ഷിക ആവശ്യങ്ങള്ക്കായി മേട്ടൂര് അണക്കെട്ട് തുറക്കാറുള്ളത്. എന്നാല് ഇത്തവണ മഴ കുറഞ്ഞതും കാവേരി നദീജല വിഹിതം കര്ണാടക വൈകിപ്പിച്ചതും കാരണം ഡാം തുറക്കുന്നത് ഏറെ വൈകുകയും, ഇത് കര്ഷകരെ വലിയ പ്രതിസന്ധിയിലാക്കുകയും ചെയ്തിരുന്നു. ജൂണ് മാസത്തില് ചെയ്യേണ്ട കുറുവ നെല്കൃഷി പലയിടത്തും മുടങ്ങിയിരുന്നു. നിലവില് ഡാമിലെ ജലനിരപ്പ് 90 അടിയായി ഉയര്ന്ന സാഹചര്യത്തിലാണ് സര്ക്കാര് ഷട്ടറുകള് തുറക്കാന് തീരുമാനിച്ചത്. ഈ സീസണില് സമ്പ നെല്കൃഷിക്കാണ് കര്ഷകര് പ്രധാനമായും തയ്യാറെടുക്കുന്നത്.
സേലം എയര്പോര്ട്ടില് നിന്നും റോഡ് ഷോ ആയിട്ടാണ് മുഖ്യമന്ത്രി സി. ജോസഫ് വിജയ് മേട്ടൂരില് എത്തിയത്. വഴിയീടനിലുടനീളം നൂറുകണക്കിന് പ്രവര്ത്തകരാണ് അദ്ദേഹത്തെ സ്വീകരിക്കാന് തടിച്ചുകൂടിയത്. തുടര്ന്ന് മേട്ടൂര് ഡാമിന്റെ ചരിത്രം വിവരിക്കുന്ന ഫോട്ടോ പ്രദര്ശനം കണ്ട ശേഷമാണ് മുഖ്യമന്ത്രി മടങ്ങിയത്.