കോണ്ഗ്രസ് വാഗ്ദാനം പാലിക്കുമെന്നും പദ്ധതി മുടക്കാന് സര്ക്കാര് ബോധപൂര്വ്വം ശ്രമിക്കുകയാണെന്നും കെപിസിസി അധ്യക്ഷന് സണ്ണി ജോസഫ് പ്രതികരിച്ചു
തിരുവനന്തപുരം: വയനാട് ഉരുള്പൊട്ടല് ദുരന്തബാധിതര്ക്കായി കോണ്ഗ്രസ് പ്രഖ്യാപിച്ച ഭവന പദ്ധതി അനിശ്ചിതത്വത്തിലായതായി റിപ്പോര്ട്ട്. പദ്ധതി പ്രഖ്യാപിച്ച് മാസങ്ങള് കഴിഞ്ഞിട്ടും നിര്മ്മാണ പ്രവര്ത്തനങ്ങള് തുടങ്ങാത്തത് വലിയ വിമര്ശനങ്ങള്ക്ക് വഴിതെളിച്ചിട്ടുണ്ട്. ഗുണഭോക്താക്കളെ തിരഞ്ഞെടുക്കുന്നതിലെ അവ്യക്തതയും എഐസിസി, കെപിസിസി നേതൃത്വങ്ങളുടെ ഏകോപനമില്ലായ്മയുമാണ് പദ്ധതി ഇഴഞ്ഞുനീങ്ങാന് കാരണമെന്ന് പാര്ട്ടി പ്ലാറ്റ്ഫോമുകളില് തന്നെ അതൃപ്തി ഉയരുന്നുണ്ട്. ദുരന്തബാധിതര്ക്കായി വീടുകള് നിര്മ്മിച്ചു നല്കുമെന്ന വാഗ്ദാനം വെറും പ്രഖ്യാപനമായി ഒതുങ്ങുമോ എന്ന ആശങ്കയിലാണ് നിലവില് ഗുണഭോക്താക്കള്.അതേസമയം, കോണ്ഗ്രസ് വാഗ്ദാനം പാലിക്കുമെന്നും പദ്ധതി മുടക്കാന് സര്ക്കാര് ബോധപൂര്വ്വം ശ്രമിക്കുകയാണെന്നും കെപിസിസി അധ്യക്ഷന് സണ്ണി ജോസഫ് പ്രതികരിച്ചു. സര്ക്കാര് പട്ടികയില് ഉള്പ്പെടാത്ത പാവപ്പെട്ടവര്ക്ക് വേണ്ടിയാണ് കോണ്ഗ്രസ് ഭവന പദ്ധതി വിഭാവനം ചെയ്തതെന്നും എന്നാല് ഭൂമി ഏറ്റെടുക്കല് നടപടികള് വൈകിപ്പിക്കുന്നത് സര്ക്കാരാണെന്നും അദ്ദേഹം കുറ്റപ്പെടുത്തി. ജനങ്ങളോട് ഉത്തരവാദിത്തമുള്ള പ്രസ്ഥാനം എന്ന നിലയില് നല്കിയ വാഗ്ദാനങ്ങള് ആത്മാര്ത്ഥതയോടെ തന്നെ നടപ്പിലാക്കുമെന്നും രാഷ്ട്രീയമായ തടസ്സങ്ങള് നീക്കി നിര്മ്മാണത്തിലേക്ക് ഉടന് കടക്കുമെന്നും അദ്ദേഹം മാധ്യമങ്ങളോട് പറഞ്ഞു.