ഇത്തരം വ്യാജ വാര്ത്തകള് പ്രചരിപ്പിച്ച് പൊതുജനങ്ങള്ക്കിടയില് ഭീതി പടര്ത്തരുതെന്ന് രാഷ്ട്രീയക്കാരോടും പൊതുസമൂഹത്തോടും അവര് അഭ്യര്ത്ഥിച്ചു
ഇന്ത്യയില് വീണ്ടും രാജ്യവ്യാപകമായ ലോക്ക്ഡൗണ് ഏര്പ്പെടുത്തിയേക്കുമെന്ന പ്രചാരണങ്ങള് അടിസ്ഥാനരഹിതമാണെന്ന് കേന്ദ്ര ധനമന്ത്രി നിര്മല സീതാരാമന് വ്യക്തമാക്കി. 2026-ലെ സാമ്പത്തിക ബില്ലിനെക്കുറിച്ചുള്ള ചര്ച്ചയ്ക്കിടെ രാജ്യസഭയിലായിരുന്നു മന്ത്രിയുടെ പ്രതികരണം. ഇത്തരം വ്യാജ വാര്ത്തകള് പ്രചരിപ്പിച്ച് പൊതുജനങ്ങള്ക്കിടയില് ഭീതി പടര്ത്തരുതെന്ന് രാഷ്ട്രീയക്കാരോടും പൊതുസമൂഹത്തോടും അവര് അഭ്യര്ത്ഥിച്ചു. നിലവില് ലോക്ക്ഡൗണ് പോലുള്ള നിയന്ത്രണങ്ങള് അയല്രാജ്യമായ പാകിസ്താനിലാണെന്നും ഇന്ത്യയില് അത്തരമൊരു സാഹചര്യമില്ലെന്നും മന്ത്രി ചൂണ്ടിക്കാട്ടി.അയല്രാജ്യങ്ങളിലെ സാമ്പത്തികവും സാമൂഹികവുമായ സാഹചര്യങ്ങളെ ഇന്ത്യയുമായി താരതമ്യം ചെയ്ത ധനമന്ത്രി, രാജ്യം അതിന്റെ വിഭവങ്ങളും പൗരന്മാരുടെ ആവശ്യങ്ങളും അതീവ ശ്രദ്ധയോടെയാണ് കൈകാര്യം ചെയ്യുന്നതെന്ന് അറിയിച്ചു. ബംഗ്ലാദേശ് ഉള്പ്പെടെയുള്ള രാജ്യങ്ങളിലെ പ്രതിസന്ധികളെ വസ്തുതാപരമായി വിലയിരുത്തുമ്പോള് ഇന്ത്യ സുരക്ഷിതമായ നിലയിലാണെന്നും, ഒരു നല്ല അയല്ക്കാരന് എന്ന നിലയില് ആവശ്യമായ ഏത് സഹായവും നല്കാന് സന്നദ്ധമാണെന്നും അവര് പറഞ്ഞു. അയല്രാജ്യങ്ങളുമായുള്ള നല്ല ബന്ധം നിലനിര്ത്തുന്നതിലാണ് ഇന്ത്യ ശ്രദ്ധ കേന്ദ്രീകരിക്കുന്നത്.മിഡില് ഈസ്റ്റിലെ നിലവിലെ സംഘര്ഷാവസ്ഥ ആഗോളതലത്തില് ബാധിക്കപ്പെട്ടിട്ടുണ്ടെങ്കിലും, അത് ഇന്ത്യന് പൗരന്മാരെ പ്രതികൂലമായി ബാധിക്കാത്ത രീതിയിലാണ് കേന്ദ്രസര്ക്കാര് ഇടപെടലുകള് നടത്തുന്നത്. വിദേശരാജ്യങ്ങളില് പ്രതിസന്ധികളുണ്ടാകുമ്പോള് ഇന്ത്യയുടെ ആഭ്യന്തര സുരക്ഷയും സാമ്പത്തിക സുസ്ഥിരതയും ഉറപ്പാക്കാന് സര്ക്കാര് പ്രതിജ്ഞാബദ്ധമാണെന്ന് ധനമന്ത്രി കൂട്ടിച്ചേര്ത്തു. പൗരന്മാര്ക്ക് ബുദ്ധിമുട്ടുകള് ഉണ്ടാകാത്ത വിധത്തില് വിവേകപൂര്ണ്ണമായ നടപടികളാണ് സര്ക്കാര് സ്വീകരിച്ചുവരുന്നതെന്നും അവര് വ്യക്തമാക്കി.