ബെംഗളൂരു: മടിവാളയില് സിനിമാ തീയറ്ററിന്റെ വനിതാ ശുചിമുറിയില് മൊബൈല് ഫോണ് ഉപയോഗിച്ച് നഗ്നദൃശ്യങ്ങള് പകര്ത്തിയ കേസില് തിയേറ്റര് ജീവനക്കാരന് ഉള്പ്പെടെ മൂന്ന് പേരെ പൊലീസ് പിടികൂടി. സിനിമയുടെ ഇടവേളയില് ശുചിമുറിയില് പോയ ഐടി ജീവനക്കാരിയുടെയും സുഹൃത്തുക്കളുടെയും പരാതിയിലാണ് നടപടി. സംഭവത്തില് തിയേറ്റര് മാനേജ്മെന്റിനെതിരെയും മടിവാള പൊലീസ് കേസെടുത്തിട്ടുണ്ട്.
തിയേറ്റര് ജീവനക്കാരനായ രാജേഷ്, സുഹൃത്ത് കമല്, പതിനേഴുകാരനായ മറ്റൊരു ആണ്കുട്ടി എന്നിവരാണ് പിടിയിലായത്. ശുചിമുറിയില് ഒളിച്ചിരുന്ന് ദൃശ്യങ്ങള് പകര്ത്താന് ശ്രമിച്ച ആണ്കുട്ടിയെ യുവതികള് പിടികൂടി ബഹളം വെച്ചതോടെയാണ് വിവരം പുറത്തറിയുന്നത്. രാജേഷും കമലും ചേര്ന്നാണ് തന്നെ ദൃശ്യങ്ങള് പകര്ത്താന് നിയോഗിച്ചതെന്ന് കുട്ടി പൊലീസിനോട് വെളിപ്പെടുത്തി. പ്രതികളുടെ അറസ്റ്റ് രേഖപ്പെടുത്തിയിട്ടുണ്ട്. പ്രായപൂര്ത്തിയാകാത്ത കുട്ടിയെ ജുവനൈല് ഹോമിലേക്ക് മാറ്റി. സംഭവത്തില് വിശദമായി അന്വേഷണം നടത്തുമെന്നും കൂടുതല് ദൃശ്യങ്ങള് ഇവര് പകര്ത്തിയിട്ടുണ്ടോ എന്ന് പരിശോധിക്കും എന്നും പൊലീസ് വ്യക്തമാക്കി.