സംസ്ഥാന സര്ക്കാരിന്റെ കൃത്യമായ ഇടപെടലുകളിലൂടെ ഉന്നത വിദ്യാഭ്യാസ മേഖലയെ അന്താരാഷ്ട്ര നിലവാരത്തിലേക്ക് ഉയര്ത്താന് കഴിഞ്ഞതായി മുഖ്യമന്തി പിണറായി വിജയന് പറഞ്ഞു. കഴിഞ്ഞ പത്ത് വര്ഷത്തില് മികച്ച വികസനമാണ് അടിസ്ഥാനതലത്തിലും അക്കാദമിക തലത്തിലും നടന്നത്. 200 കോടി രൂപയുടെ ട്രാന്സ്ലേഷണല് റിസര്ച്ച് സെന്ററുകള്, നാലുവര്ഷ ബിരുദം, ഉന്നത നിലവാരത്തിലുള്ള ഗവേഷണ പുരസ്ക്കാരങ്ങള്, സ്കോളര്ഷിപ്പുകള് എന്നിവ നടപ്പിലാക്കാനായി. മാര് ഇവാനിയോസ് കോളേജിന്റെ പ്ലാറ്റിനം ജൂബിലി ആഘോഷങ്ങളുടെ സമാപന പൊതുസമ്മേളനത്തില് മുഖ്യപ്രഭാഷണം നടത്തുകയായിരുന്നു മുഖ്യമന്ത്രി.
കേരളത്തിന്റെയാകെ വിദ്യാഭ്യാസ പുരോഗതിയില് സമാനതകളില്ലാത്ത സ്ഥാനം വഹിക്കുന്ന ഒരു മാതൃകാ കലാലയമാണ് മാര് ഇവാനിയോസ് കോളേജ്. 1949-ല് ആര്ച്ച് ബിഷപ്പ് മാര് ഇവാനിയോസ് സ്ഥാപിച്ച ഈ കലാലയം, സ്വതന്ത്രമായ അറിവിനെക്കുറിച്ചും ഭയമില്ലാത്ത മനസ്സിനെക്കുറിച്ചും സ്വപ്നം കണ്ട ശാന്തിനികേതനിലെ ചിന്തകളില് നിന്ന് പ്രചോദനം ഉള്ക്കൊണ്ടാണ് രൂപീകൃതമായത്. 145 വിദ്യാര്ത്ഥികളുമായി ആരംഭിച്ച ഈ കലാലയം ഇന്ന് കേരളത്തിലെ മികവുറ്റ ബൃഹത് കലാലയങ്ങളില് ഒന്നാണ്. സാധാരണ കുടുംബങ്ങളില് നിന്നുള്ള കുട്ടികളെ മികവുള്ളവരാക്കി മാറ്റുന്നതിനൊപ്പം ജീവിതപാഠങ്ങളും സാമൂഹ്യ ഉത്തരവാദിത്വവും ഇവിടെ പകര്ന്നു നല്കുന്നു.
സംസ്ഥാനത്തെ സര്വ്വകലാശാലകളും കോളേജുകളും ദേശീയ റാങ്കിങ്ങില് നേട്ടം കൈവരിക്കുന്നതില് മാര് ഇവാനിയോസ് കോളേജ് പോലെയുള്ള സ്ഥാപനങ്ങളുടെ സംഭാവന വലുതാണ്. എന്.ഐ.ആര്.എഫ് റാങ്കിങ്ങില് ഇന്ത്യയിലെ മികച്ച 100 കോളേജുകളില് 36-ാം സ്ഥാനത്താണ് ഈ കോളേജ്. 1999-ല് NAAC അക്രഡിറ്റേഷന് നേടിയ കോളേജ്, 2019-ല് എ പ്ലസ് ഗ്രേഡും കരസ്ഥമാക്കി. 2014-ല് സ്വയംഭരണ പദവി ലഭിച്ച കലാലയം പഠന നിലവാരം മെച്ചപ്പെടുത്താന് മറ്റ് സ്ഥാപനങ്ങളെ കൂടി സഹായിക്കുന്നുണ്ട്. ഭരണാധികാരികള്, പാര്ലമെന്ററി രംഗത്തെ പ്രഗത്ഭര്, സാമൂഹിക-സാംസ്കാരിക-കായിക മേഖലകളില് മുദ്ര പതിപ്പിച്ചവര് എന്നിങ്ങനെ നാടിനും ലോകത്തിനും ഉപകരിക്കുന്ന ഒട്ടേറെ വ്യക്തിത്വങ്ങളെ മാര് ഇവാനിയോസ് ക്യാമ്പസ് വാര്ത്തെടുത്തിട്ടുണ്ട്.
മതേതരത്വത്തിന്റെ പ്രതീകമായ ഇത്തരം കലാലയങ്ങള് സമൂഹത്തിന്റെ പൊതുനന്മയ്ക്ക് നല്കുന്ന പങ്ക് വളരെ വലുതാണ്. നമ്മുടെ നാടിന്റെ മതനിരപേക്ഷതയും പരസ്പര വിശ്വാസവും തകര്ക്കാന് നടക്കുന്ന ശ്രമങ്ങളെ തിരിച്ചറിയാനും അവയെ ചെറുക്കാനുമുള്ള സാമൂഹ്യബോധം വളര്ത്തുന്ന ഇടമായി കലാലയങ്ങള് മാറണമെന്നും മുഖ്യമന്ത്രി പറഞ്ഞു. കോളേജിന്റെ പ്രവര്ത്തനങ്ങള്ക്ക് നേതൃത്വം നല്കുന്ന മലങ്കര കത്തോലിക്കാ സഭയ്ക്കും കര്ദിനാള് മാര് ബസേലിയോസ് ക്ലീമീസ് കതോലിക്കാബാവയ്ക്കും കോളേജിലെ അധ്യാപകര്ക്കും വിദ്യാര്ത്ഥികള്ക്കും മുഖ്യമന്ത്രി ആശംസകളും നേര്ന്നു.