കൊച്ചി: കാക്കനാട് 22 ഗ്രാം എംഡിഎംഎ പികൂടിയ കേസില് അന്വേഷണം സിനിമാ മേഖലയിലേക്ക് വ്യാപിപ്പിച്ചു. അറസ്റ്റിലായ പ്രതികളില് ഒരാളായ കല്യാണി സിനിമാ പ്രവര്ത്തകരുമായി ലഹരി ഇടപാടുകള് നടത്തിയിരുന്നുവെന്നാണ് പോലീസിന് ലഭിച്ച വിവരം. ഇവര് ആര്ക്കൊക്കെയാണ് ലഹരി കൈമാറിയതെന്ന കാര്യത്തിലാണ് നിലവില് അന്വേഷണം പുരോഗമിക്കുന്നത്. പ്രതികളെ പോലീസ് കസ്റ്റഡിയില് വാങ്ങി കൂടുതല് ചോദ്യം ചെയ്യും.
ഇന്ഫോപാര്ക്ക് സ്റ്റേഷന് പരിധിയില് വെച്ചാണ് 22 ഗ്രാം എംഡിഎംഎയുമായി ഉനൈസും കല്യാണിയും ഡാന്സാഫ് ടീമിന്റെ പിടിയിലായത്. കല്യാണി മോഡലും സിനിമാ പ്രൊമോഷന് മേഖലയില് പ്രവര്ത്തിക്കുന്നയാളുമാണ്. ഉനൈസും കല്യാണിയും മുന്പ് ലഹരിക്കേസുകളില് പ്രതികളായിട്ടുണ്ട്. വിവിധ സ്ഥലങ്ങളില് വാടകയ്ക്ക് ഫ്ലാറ്റുകള് എടുത്താണ് ഇവര് ലഹരി ഇടപാടുകള് നടത്തിയിരുന്നത്.
രഹസ്യവിവരത്തെ തുടര്ന്ന് ഡാന്സാഫ് ടീം ഇവര് താമസിച്ച ഹോട്ടലില് നടത്തിയ പരിശോധനയിലാണ് ലഹരിവസ്തുക്കള് കണ്ടെടുത്തത്. 22 ഗ്രാം എംഡിഎംഎ കൂടാതെ, ലഹരി ഉപയോഗിക്കാനുള്ള ഫ്യൂമിങ് പൈപ്പുകള്, അളവെടുക്കാനുള്ള ത്രാസ് എന്നിവയും ഇവരുടെ മുറിയില് നിന്നും പിടിച്ചെടുത്തു. സിനിമാ മേഖലയിലേക്കുള്ള ലഹരിയുടെ ഉറവിടം തേടിയുള്ള അന്വേഷണം നിര്ണായകമാകും.