ബെംഗളൂരു: പ്രണയാഭ്യര്ത്ഥന നിരസിച്ചതിനെ തുടര്ന്നുണ്ടായ വൈരാഗ്യത്തില് 20 വയസ്സുള്ള ബി.ഫാം വിദ്യാര്ത്ഥിനിയെ യുവാവ് നടുറോഡില് ക്രൂരമായി കുത്തിക്കൊന്നു. ബെംഗളൂരുവില് മന്ത്രി മാളിന് സമീപമുള്ള റെയില്വേ ട്രാക്കിന് അടുത്തുള്ള റോഡിലാണ് ഞെട്ടിക്കുന്ന കൊലപാതകം നടന്നത്. യാമിനി പ്രിയ എന്ന വിദ്യാര്ത്ഥിനിയാണ് ദാരുണമായി കൊല്ലപ്പെട്ടത്.
റിപ്പോര്ട്ടുകള് പ്രകാരം, വ്യാഴാഴ്ച രാവിലെ പരീക്ഷ എഴുതാന് പോയ ശേഷം വീട്ടിലേക്ക് മടങ്ങുന്ന വഴിക്കാണ് പ്രിയ ആക്രമിക്കപ്പെട്ടത്. യുവതിയെ ബൈക്കില് പിന്തുടര്ന്നെത്തിയ പ്രതിയായ വിഗ്നേഷ്, ആളുകള് നോക്കിനില്ക്കെ കൈവശമുണ്ടായിരുന്ന കത്തി ഉപയോഗിച്ച് പ്രിയയുടെ കഴുത്തില് പലതവണ കുത്തിയിറക്കുകയായിരുന്നു. പ്രണയം നിരസിച്ചതിലുള്ള പ്രതികാരമാണ് കൊലപാതകത്തിന് കാരണമെന്ന് പൊലീസ് പ്രാഥമികമായി സ്ഥിരീകരിക്കുന്നു.
കൊലപാതകത്തിന് ശേഷം വിഗ്നേഷ് സംഭവസ്ഥലത്തുനിന്ന് ഓടി രക്ഷപ്പെട്ടു. വിവരമറിഞ്ഞ് ശ്രീറാംപുര പോലീസ് ഉടന് സ്ഥലത്തെത്തി ഇന്ക്വസ്റ്റ് നടപടികള് പൂര്ത്തിയാക്കി. പ്രതിയെ എത്രയും പെട്ടെന്ന് പിടികൂടാനായി പോലീസ് ഊര്ജിത അന്വേഷണം ആരംഭിച്ചിട്ടുണ്ട്.