തിരുവനന്തപുരം : രഞ്ജി ട്രോഫിക്കുള്ള കേരള ടീമിനെ പ്രഖ്യാപിച്ചു. 15 അംഗ ടീമിനെയാണ് പ്രഖ്യാപിച്ചത്. മുഹമ്മദ് അസറുദ്ദീനാണ് ടീമിന്റെ ക്യാപ്റ്റന്. സഞ്ജു സാംസനെയും ടീമില് ഉള്പ്പെടുത്തിയിട്ടുണ്ട്. ബാബ അപരാജിത്താണ് വൈസ് ക്യാപ്റ്റന്. ഈ മാസം 15-നാണ് രഞ്ജി ട്രോഫിയുടെ പുതിയ സീസണ് തുടക്കമാകുന്നത്. ഗ്രീന്ഫീല്ഡ് സ്റ്റേഡിയത്തില് നടക്കുന്ന ആദ്യ മല്സരത്തില് മഹാരാഷ്ട്രയാണ് കേരളത്തിന്റെ എതിരാളികള്.
ആദ്യമായി രഞ്ജി ട്രോഫിയുടെ ഫൈനലിലെത്തി ചരിത്രം സൃഷ്ടിച്ച കഴിഞ്ഞ സീസണിലെ മിക്ക അംഗങ്ങളെയും ഇത്തവണയും ഉള്പ്പെടുത്തിയിട്ടുണ്ട്. സച്ചിന് ബേബിക്ക് പകരം മുഹമ്മദ് അസറുദ്ദീന് ക്യാപ്റ്റന് സ്ഥാനത്തേയ്ക്ക് എത്തിയതാണ് പ്രധാന മാറ്റം. ഈ സീസണിലെ ദുലീപ് ട്രോഫിയില് ദക്ഷിണ മേഖല ടീമിനെ നയിച്ചതും അസറുദ്ദീനായിരുന്നു. കഴിഞ്ഞ രഞ്ജി സീസണില് കേരളത്തിനായി ഏറ്റവും കൂടുതല് റണ്സ് നേടിയ അസറുദ്ദീന്, ടീമിന്റെ ഫൈനല് വരെയുള്ള മുന്നേറ്റത്തിലും നിര്ണ്ണായക പങ്കു വഹിച്ചു. അസറുദ്ദീനൊപ്പം, സഞ്ജു സാംസനും, രോഹന് കുന്നുമ്മലും, സല്മാന് നിസാറും, അഹ്മദ് ഇമ്രാനും, ബാബ അപരാജിത്തും, വത്സല് ഗോവിന്ദും, ഷോണ് റോജറുമടങ്ങുന്ന കരുത്തുറ്റ ബാറ്റിങ് നിരയാണ് ഇത്തവണത്തേത്. നിധീഷ് എംഡി, ബേസില് എന് പി, അങ്കിത് ശര്മ്മ, ഏദന് ആപ്പിള് ടോം എന്നിവരടങ്ങുന്ന ബൌളിങ് നിരയും കരുത്തുറ്റതാണ്.
തമിഴ്നാട് ബാറ്റര് ബാബ അപരാജിത്തും മധ്യപ്രദേശിന്റെ ഇടംകയ്യന് സ്പിന്നര് അങ്കിത് ശര്മ്മയുമാണ് ഇത്തവണത്തെ അതിഥി താരങ്ങള്. ബാബ അപരാജിത്ത് കഴിഞ്ഞ സീസണിലും ടീമിനൊപ്പമുണ്ടായിരുന്നു.
രഞ്ജി ട്രോഫി എലൈറ്റ് ഗ്രൂപ്പ് ബിയിലാണ് ഇത്തവണ കേരളം സ്ഥാനം പിടിച്ചിരിക്കുന്നത്. ഗോവ, പഞ്ചാബ്, മധ്യപ്രദേശ്, , കര്ണ്ണാടക, സൌരാഷ്ട്ര, ചണ്ഡീഗഢ്, മഹാരാഷ്ട്ര എന്നിവരാണ് ഗ്രൂപ്പിലെ മറ്റ് ടീമുകള്. കഴിഞ്ഞ സീസണില് ടീമിനെ പരിശീലിപ്പിച്ച അമയ് ഖുറേസിയ തന്നെയാണ് ഇത്തവണത്തെയും ഹെഡ് കോച്ച്.
കേരള ടീം – മുഹമ്മദ് അസറുദ്ദീന് (ക്യാപ്റ്റന്), ബാബ അപരാജിത്ത് (വൈസ് ക്യാപ്റ്റന്), സഞ്ജു സാംസന്, രോഹന് എസ് കുന്നുമ്മല്, വത്സല് ഗോവിന്ദ് ശര്മ്മ, അക്ഷയ് ചന്ദ്രന്, സച്ചിന് ബേബി, സല്മാന് നിസാര്, അങ്കിത് ശര്മ്മ, നിധീഷ് എം ഡി, ബേസില് എന് പി, ഏദന് ആപ്പിള് ടോം, അഹമ്മദ് ഇമ്രാന്, ഷോണ് റോജര്, അഭിഷേക് പി നായര്.
ഒഫീഷ്യല്സ്
നസീര് മച്ചാന് (ടീം മാനേജര് ), അമയ് ഖുറേസിയ ( ഹെഡ് കോച്ച്), ഡേവിസ് ജെ മണവാളന് ( കോച്ച്), വൈശാഖ് കൃഷ്ണ (സ്ട്രെങ്ത് ആന്റ് കണ്ടീഷനിങ് കോച്ച്), ഉണ്ണികൃഷ്ണന് ആര് എസ് ( ഫിസിയോതെറാപ്പിസ്റ്റ്), ഗിരീഷ് ഇ കെ ( ത്രോ ഡൌണ് സ്പെഷ്യലിസ്റ്റ്), ദീപേഷ് ശര്മ്മ ( ത്രോ ഡൌണ് സ്പെഷ്യലിസ്റ്റ്), വിജയ് ശ്രീനിവാസന് പി എസ് ( പെര്ഫോമന്സ് അനലിസ്റ്റ്), കിരണ് എ എസ് ( ടീം മെസ്സ്വര്)പി പ്രശാന്ത് (സെലക്ഷന് കമ്മറ്റി ചെയര്മാന്)