ആലപ്പുഴ: ഫോണ് ഉപയോഗിക്കുന്നതുമായി ബന്ധപ്പെട്ട തര്ക്കത്തെ തുടര്ന്ന് 17 വയസ്സുകാരിയായ മകള് മാതാവിനെ കുത്തിപ്പരുക്കേല്പ്പിച്ചു. ഗുരുതരമായി പരുക്കേറ്റ മഹിളാ കോണ്ഗ്രസ് നേതാവ് കൂടിയായ യുവതിയെ വണ്ടാനം മെഡിക്കല് കോളേജ് ആശുപത്രിയില് പ്രവേശിപ്പിച്ചു. യുവതിയുടെ കഴുത്തിനാണ് പരുക്കേറ്റിട്ടുള്ളത്.
മൊബൈല് ഫോണിന്റെ സ്ഥിരമായ ഉപയോഗം മാതാവ് വിലക്കിയതിനെത്തുടര്ന്നുണ്ടായ തര്ക്കമാണ് ഇന്ന് ആക്രമണത്തില് കലാശിച്ചത്. തര്ക്കത്തിനിടെ പ്രകോപിതയായ മകള് കത്തി ഉപയോഗിച്ച് അമ്മയുടെ കഴുത്തിലേക്ക് കുത്തുകയായിരുന്നു. ഉടന്തന്നെ ആശുപത്രിയിലേക്ക് മാറ്റിയ യുവതി നിലവില് തീവ്ര പരിചരണ വിഭാഗത്തില് ചികിത്സയിലാണ്. കുത്തേറ്റ യുവതി മഹിളാ കോണ്ഗ്രസിന്റെ ആലപ്പുഴയിലെ പ്രധാനപ്പെട്ട നേതാവ് കൂടിയാണ്.