പരപ്പ : അന്തര്ദേശീയ ആദിവാസി ദിനാചരണത്തിന്റെ ഭാഗമായി പരപ്പയില് വിവിധ ആദിവാസി സംഘടനകളുടെ നേതൃത്വത്തില് ഗോത്രജന സംഗമവും സെമിനാറും സംഘടിപ്പിച്ചു. പരപ്പ വൈഎംസിഎ ഹാളില് ഉണര്ത്തുപാട്ടോടെ പരിപാടികള്ക്ക് തുടക്കം കുറിച്ചു. ഡോക്ടര് ബാബാസാഹിബ് അംബേദ്കര്, മഹാത്മ അയ്യങ്കാളി എന്നിവരുടെ ഛായാ ചിത്രത്തിന് മുന്നില് ദീപം തെളിയിച്ച് പുഷ്പാര്ച്ചന നടത്തിക്കൊണ്ട് വിവിധ സംഘടനാ നേതാക്കളും ഊരു മൂപ്പന്മാരും ചേര്ന്ന് ഉദ്ഘാടനം നിര്വഹിച്ചു.
ഉദ്ഘാടന സമ്മേളനത്തില് സംഘാടകസമിതി കണ്വീനര് രാഘവന് അടുക്കം സ്വാഗതം പറഞ്ഞു സംഘാടകസമിതി ചെയര്മാന് കമലാക്ഷന് കക്കോല് അധ്യക്ഷത വഹിച്ചു വര്ക്കിംഗ് ചെയര്മാന് രമ്യ ബാലകൃഷ്ണന് നന്ദി പറഞ്ഞു. തുടര്ന്ന് നടന്ന സെമിനാറില് ‘ജാതിവ്യവസ്ഥയും അധികാരവും: ഇന്നലെ ഇന്ന് നാളെ’ എന്ന വിഷയത്തില് പ്രശസ്ത വാഗ്മിയും
സംസ്കൃതപണ്ഡിതനും ദളിത് ചിന്തകനും എഴുത്തുകാരനുമായ ഡോ. ടി.എസ് ശ്യാംകുമാര് പ്രഭാഷണം നടത്തി. പ്രോഗ്രാം കമ്മിറ്റി ചെയര്മാന് ജയചന്ദ്രന് ചാമക്കുഴി മോഡറേറ്ററായി. പ്രോഗ്രാം കമ്മിറ്റി കണ്വീനര് സതീശന് മാസ്റ്റര് സ്വാഗതവും വര്ക്കിംഗ് ചെയര്മാന് മധു മെമ്പര് നന്ദിയും പറഞ്ഞു. ഉച്ചയ്ക്കുശേഷം നടന്ന സെമിനാറില് ‘ഇന്ത്യന് ഭരണഘടനയും സംവരണവും നേരിടുന്ന വെല്ലുവിളികള്’ എന്ന വിഷയത്തില് ഡോക്ടര് മാളവിക ബിന്നി വിഷയാവതരണം നടത്തി സംസാരിച്ചു. പി കെ രാമചന്ദ്രന് മോഡറേറ്ററായി പ്രോഗ്രാം കമ്മിറ്റി കണ്വീനര് രതീഷ് കാട്ടുമാടം സ്വാഗതവും സംഘാടകസമിതി ട്രഷറര് ടി ചന്ദ്രകുമാര് നന്ദിയും പറഞ്ഞു.
മുതിര്ന്ന മംഗലംകളി കലാകാരന്മാരായ ഉബിച്ചിയമ്മ, കൊച്ചു വെളുത്തന് വിശിഷ്ട ക്ഷണിതാക്കളായി. കാസര്കോട് തുടി സാംസ്കാരിക സമിതിക്ക് വേണ്ടി ഡോക്ടര് വി ബാലകൃഷ്ണന്, ദ്രാവിഡ ഗോത്രകല അക്കാദമിക്ക് വേണ്ടി ശിവദാസന് ചുള്ളിക്കര, ഗോത്രബന്ധു തായന്നൂരിന് വേണ്ടി പത്മനാഭന് കൂളിമാവ്, പിആര്ഡിഎസിന് വേണ്ടി സുരേന്ദ്രന് കാലിക്കടവ്, എംപിഎംഎസ് ജില്ലാ കമ്മിറ്റി അംഗം ബിജു മുടന്തേന്പാറ, എ കെ എം എസ് പ്രതിനിധി കുഞ്ഞിക്കണ്ണന് പൂക്കുന്നം, വേടന് ഫാന്സിനെ പ്രതിനിധീകരിച്ച് രാകേഷ് മാലോം മംഗളംകളി അക്കാദമിക്ക് വേണ്ടി കണ്ണന് ആനപ്പെട്ടി തുടങ്ങിയവര് സെമിനാറിലും ചര്ച്ചയിലും പങ്കെടുത്തു.