കാസറഗോഡ്: അന്താരാഷ്ട്ര യുവജന ദിനാചരണത്തോടനുബന്ധിച്ച് എച്ച് ഐ വി/എയ്ഡ്സിനെ കുറിച്ച് ജില്ലയിലെ കോളേജ് വിദ്യാര്ത്ഥികള്ക്കിടയില് അവബോധം സൃഷ്ടിക്കുന്നതിനായി റെഡ് റണ് മാരത്തോണ് മത്സരം സംഘടിപ്പിച്ചു.
കേരള സ്റ്റേറ്റ് എയ്ഡ്സ് കണ്ട്രോള് സൊസൈറ്റി, ജില്ലാ മെഡിക്കല് ഓഫീസ് (ആരോഗ്യം), കാസറഗോഡ്, എന് എസ് എസ് കേരള എന്നിവയുടെ സംയുക്താഭിമുഖ്യത്തില് കാലിച്ചാനടുക്കം മുതല് കരിന്തളം ഗവണ്മെന്റ് കോളേജ് പരിസരം വരെയാണ് മത്സരം സംഘടിപ്പിച്ചത്. ജില്ലയിലെ വിവിധ കോളേജുകളിലെ കുട്ടികള് പങ്കെടുത്തു. മാരത്തണ് ആണ്കുട്ടികളുടെ വിഭാഗത്തില് അനില് എ (കേരളം കേന്ദ്ര സര്വകലാശാല, പെരിയ) മിഥുന് എന് (കാസറഗോഡ് ഗവണ്മെന്റ് കോളേജ്), അഭിഷേക് ബാബു (ഇ.കെ.എന്.എം ഗവണ്മെന്റ് കോളേജ് എളേരിത്തട്ട്) എന്നിവര് യഥാക്രമം ഒന്നും രണ്ടും മുന്നും സ്ഥാനങ്ങള് നേടി. പെണ്കുട്ടികളുടെ വിഭാഗത്തില് ലിതിന കെ വി (ഇ.കെ.എന്.എം ഗവണ്മെന്റ് കോളേജ് എളേരിത്തട്ട്), ദേവനന്ദ ദിനേശ് (ഗവണ്മെന്റ് ആര്ട്സ് ആന്ഡ് സയന്സ് കോളേജ് കരിന്തളം) എന്നിവര് യഥാക്രമം ഒന്നും രണ്ടും സ്ഥാനങ്ങള് നേടി. ഒന്നും രണ്ടും മൂന്നും സ്ഥാനം കരസ്ഥമാക്കിയവര്ക്ക് യഥാക്രമം 5000 രൂപ, 4000 രൂപ, 3000 രൂപ കാഷ് അവാര്ഡും സര്ട്ടിഫിക്കറ്റും സമ്മാനമായി നല്കി. ഒന്നാം സ്ഥാനം ലഭിച്ച ടീം ഓഗസ്റ്റ് 11 ന് തൃശൂരില് വച്ച് നടക്കുന്ന സംസ്ഥാനതല മത്സരത്തില് ജില്ലയെ പ്രതിനിധീകരിച്ച് പങ്കെടുക്കും.
മാരത്തോണ് കിനാനൂര് കരിന്തളം ഗ്രാമപഞ്ചായത്ത് പ്രസിഡന്റ് ടി കെ രവി ഫ്ലാഗ് ഓഫ് ചെയ്തു. ജില്ലാ എയ്ഡ്സ് കണ്ട്രോള് ഓഫീസര് ഡോ. ആരതി രഞ്ജിത് അധ്യക്ഷത വഹിച്ചു. ജില്ലാ എഡ്യുക്കേഷന് മീഡിയ ഓഫീസര് അബ്ദുള് ലത്തീഫ് മഠത്തില് സ്വാഗതവും നീലേശ്വരം താലൂക്ക് ആശുപത്രി ഹെല്ത്ത് സൂപ്പര്വൈസര് അജിത് ഫിലിപ്പ് നന്ദിയും പറഞ്ഞു. ജില്ലാ എന് എസ് എസ് കോര്ഡിനേറ്റര് ഡോ വിനേഷ് കുമാര് കെ വി, എന് എസ് എസ് നോഡല് ഓഫീസര് സമീര് സിദ്ദിഖി, കരിന്തളം ഗവണ്മെന്റ് കോളേജ് പ്രിന്സിപ്പല് വിദ്യ കെ, ഡെപ്യൂട്ടി ജില്ലാ എഡ്യുക്കേഷന് മീഡിയ ഓഫീസര് ഹസീബ് പി പി, ഹെല്ത്ത് ഇന്സ്പെക്ടര് സുരേഷ് ബാബു, ദേശീയ ആരോഗ്യ ദൗത്യം ജൂനിയര് കണ്സല്ട്ടന്റ് കമല് ജോസ് എന്നിവര് സംസാരിച്ചു.