പാലക്കുന്ന് : പാലക്കുന്ന് കഴകം ഭഗവതി ക്ഷേത്രത്തില് ഭരണി ഉത്സവത്തിന് മുന്നോടിയായ ‘ഭരണി കുറിക്കല്’ ചടങ്ങ് ഭണ്ഡാര വീട്ടില് നടന്നു. 24 മുതല് 28 വരെയാണ് ഉത്സവം.
ഭരണിക്കുഞ്ഞിയായി ഇത്തവണയും ഉദുമ പെരിയവളപ്പില് പി. വി. പ്രകാശന്റെയും കെ. വി. ശ്രീജയുടെയും മകളായ പി. വി. അമേയക്കാണ് നിയോഗം. ഉദുമ ഗവ. എല്. പി. സ്കൂളില് മൂന്നാം തരം വിദ്യാര്ഥിനിയാണ്.
ഭണ്ഡാരവീട് പടിഞ്ഞാറ്റയില് സ്ഥാനികരും കഴകം പ്രസിഡന്റും ഭരണികുഞ്ഞിയുടെ ശിരസ്സില് അരിയിട്ട് അനുഗ്രഹിക്കുന്ന ‘വാഴിക്കല്’ ചടങ്ങില് സാക്ഷ്യം വഹിക്കാന് ബന്ധുക്കള് അടക്കം നിരവധി പേര് തിരുമുറ്റത്തെത്തി. അമേയ മൂന്നാം വട്ടമാണ് ഭരണികുഞ്ഞിയാകുന്നത്.
ദേവി ക്ഷേത്രങ്ങളില് പൊതുവെ മീനമാസത്തിലാണ് ഭരണി ഉത്സവം നടക്കുക. കുംഭത്തില് തൃക്കണ്ണാട് ആറാട്ടിന്റെ തുടര്ച്ചയായി പാലക്കുന്നില് ഉത്സവം കൊടിയേറുന്നതിനാല് ആ നക്ഷത്രത്തില് ജനിച്ച 5 നും 10നും മധ്യേ പ്രായമുള്ള കഴക പരിധിയിലെ പെണ്കുട്ടിയെ ദേവിയുടെ ജന്മ നക്ഷത്ര പ്രതീകമായി വാഴിക്കുന്നതാണ് വഴക്കം.
കൊടിയേറ്റം മുതല് ഉത്സവം അവസാനിക്കും വരെ ഭരണികുഞ്ഞി ആചാര സ്ഥാനികരോടൊപ്പം ഉത്സവം ചടങ്ങുകളില് പങ്കെടുക്കും.