റിയാദ്: ലോകത്തെ ഏറ്റവും ദൈര്ഘ്യമുള്ള മെട്രോ റെയിലായ റിയാദ് മെട്രോ ഈ മാസം 27 ന് പ്രവര്ത്തനം ആരംഭിക്കും. ആദ്യ ഘട്ടമായി ഒലയ-ബത്ഹ-അല് ഹൈര് ബ്ലൂ ലൈന്, കിങ് അബ്ദുല്ല റോഡിന് സമാന്തരമായ റെഡ് ലൈന്, അബ്ദുല് റഹ്മാന് ബിന് ഔഫ് റോഡിനും ശൈഖ് ഹസന് ബിന് ഹുസൈന് റോഡിനും സമാന്തരമായ വയലറ്റ് ലൈനുകളിലാണ് ആദ്യം ട്രെയിനുകള് ഓടിത്തുടങ്ങുന്നത്.
അവശേഷിക്കുന്ന മൂന്ന് ലൈനുകളില് ഡിസംബര് അഞ്ച് മുതല് ട്രെയിന് സര്വീസ് ആരംഭിക്കും. മദീന മുനവ്വറ റോഡിനും സഊദ് ബിന് അബ്ദുല് റഹ്മാന് അല് അവ്വല് റോഡിനും സമാന്തരമായ ഓറഞ്ച് ലൈന്, റിയാദ് കിങ് ഖാലിദ് ഇന്റര്നാഷനല് എയര്പ്പോര്ട്ടില്നിന്നുള്ള യെല്ലോ ലൈന്, കിങ് അബ്ദുല് അസീസ് റോഡിന് സമാന്തരമായ ഗ്രീന് ലൈന് എന്നിവയിലൂടെ ബാക്കി ട്രെയിനുകള് കൂടി ഓട്ടം ആരംഭിക്കുന്നതോടെ റിയാദ് മെട്രോ റെയില് പദ്ധതി പൂര്ണമാവും. റിയാദ് സിറ്റി റോയല് കമീഷനാണ് മെട്രോയുടെ നടത്തിപ്പുകാര്.
ടിക്കറ്റ് നിരക്ക് ഉടന് പ്രഖ്യാപിക്കും. തുടക്കത്തില് ടിക്കറ്റ് നിരക്കില് 20 മുതല് 30 ശതമാനം ഇളവ് ഏര്പ്പെടുത്തിയേക്കും. റിയാദ് ബസ് സര്വീസില് ഉപയോഗിക്കുന്ന ദര്ബ് കാര്ഡുകളും ബാങ്കുകളുടെ എ.ടി.എം കാര്ഡുകളും ഉപയോഗിച്ച് ടിക്കറ്റ് എടുക്കാന് അനുവദിച്ചേക്കും. ആറ് ലൈനുകളിലായി 176 കിലോമീറ്റര് ദൈര്ഘ്യമാണ് ആകെയുള്ളത്. ഇതില് 46.3 കിലോമീറ്റര് ഭൂമിക്കടിയിലൂടെയാണ്. ഇതില് 35 കിലോമീറ്റര് തുരങ്ക പാത ഒലയ-ബത്ഹ-അല് ഹൈര് ബ്ലൂ ലൈനിലാണ്. 176 കിലോമീറ്റര് പാതക്കിടയില് ആെക 84 മെട്രോ സ്റ്റേഷനുകളുണ്ട്. അതില് മൂന്നെണ്ണം ഏറ്റവും വലുതാണ്.
അതിലൊരെണ്ണം ബത്ഹയിലാണ്. ബ്ലൂ, റെഡ്, ഓറഞ്ച്, യെല്ലോ, ഗ്രീന്, വയലറ്റ് എന്നീ ആറ് നിറങ്ങളാണ് റെയില് പാതക്കും ട്രയിനുകള്ക്കും നല്കിയിട്ടുള്ളത്. ഓരോ ലൈനിനും ട്രെയിനും അതത് നിറങ്ങളുടെ പേരാണ് നല്കിയിരിക്കുന്നത്. മെട്രോ സ്റ്റേഷനുകളെയും നഗരത്തിലെ മുക്കുമൂലകളെയും ബന്ധിപ്പിച്ച് കൊണ്ട് റിയാദ് ബസ് സര്വീസുമുണ്ടാകും. നിലവില് റിയാദ് നഗരത്തിലെ വിവിധ റൂട്ടുകളിലായി ആയിരത്തോളം ബസുകള് സര്വീസ് നടത്തുന്നുണ്ട്. ഈ സര്വീസുകളെ അതതിടങ്ങളിലെ മെട്രോ സ്റ്റേഷനുകളുമായി ബന്ധിപ്പിക്കും.