ആദ്യഘട്ടത്തില്‍ 60 ബസുകളും തിരക്ക് വര്‍ധിക്കുന്ന മുറയ്ക്ക് 80 ബസുകളും സര്‍വീസിനായി വിന്യസിക്കും. മന്ത്രി കെ. മുരളീധരന്റെ അധ്യക്ഷതയില്‍ ചേര്‍ന്ന ഉദ്യോഗസ്ഥരുടെയും ജനപ്രതിനിധികളുടെയും അവലോകന യോഗത്തിലാണ് ഇത് സംബന്ധിച്ച തീരുമാനമായത്. 24 മണിക്കൂറും റൗണ്ട് ദി ക്ലോക്ക് സേവനത്തിനായി ഉദ്യോഗസ്ഥരെയും ജീവനക്കാരെയും സ്ഥലത്ത് വിന്യസിക്കുന്നതായിരിക്കും.
തീര്‍ത്ഥാടകര്‍ക്കായി വിപുലമായ ആരോഗ്യ-സുരക്ഷാ ക്രമീകരണങ്ങളാണ് ചെങ്ങന്നൂരില്‍ ഒരുക്കുന്നത്. ഗവ. ബോയ്‌സ് ഹൈസ്‌കൂളിലും പ്രാദേശിക ആശുപത്രിയിലുമായി കിടക്കകളും ഐ.സി.യു. സൗകര്യങ്ങളും അയ്യപ്പഭക്തന്മാര്‍ക്കായി പ്രത്യേകം നീക്കിവെക്കും. ഇതിന് പുറമെ റെയില്‍വേ സ്റ്റേഷനില്‍ 24 മണിക്കൂറും പ്രവര്‍ത്തിക്കുന്ന ക്ലിനിക്കും ഹെല്‍പ് ഡെസ്‌കും സജ്ജമാക്കും. സുരക്ഷ ഉറപ്പാക്കുന്നതിനായി 24 മണിക്കൂറും പ്രവര്‍ത്തിക്കുന്ന പോലീസ് കണ്‍ട്രോള്‍ റൂമും 250-ഓളം പോലീസ്, ഹോം ഗാര്‍ഡ് ഉദ്യോഗസ്ഥരെയും മേഖലയില്‍ നിയോഗിക്കും.
നഗരസഭയുടെ നേതൃത്വത്തില്‍ 500 പേര്‍ക്ക് വിരിവെക്കാനുള്ള സൗകര്യവും 20 പുതിയ ശുചിമുറികളും തയാറാക്കും. ഭക്ഷ്യസുരക്ഷ, കുടിവെള്ള വിതരണം, തടസ്സമില്ലാത്ത വൈദ്യുതി ലഭ്യത എന്നിവ ഉറപ്പാക്കാന്‍ ബന്ധപ്പെട്ട വകുപ്പുകള്‍ക്ക് നിര്‍ദേശം നല്‍കിയിട്ടുണ്ട്. കൂടാതെ റവന്യൂ, പോലീസ്, ആരോഗ്യം തുടങ്ങിയ വകുപ്പുകളെ ഏകോപിപ്പിച്ച് സംയുക്ത പരിശോധനാ സ്‌ക്വാഡുകളും ആംബുലന്‍സ് സൗകര്യങ്ങളും സജ്ജമാക്കും. പുത്തന്‍വീട്ടില്‍ പടി റെയില്‍വേ അടിപ്പാത മുതല്‍ മഹാദേവക്ഷേത്രം വരെയുള്ള റോഡിന്റെ അറ്റകുറ്റപ്പണികള്‍ പൂര്‍ത്തിയാക്കി 15-ഓടെ തുറന്നുകൊടുക്കുമെന്നും അധികൃതര്‍ വ്യക്തമാക്കി.