സ്വാതന്ത്ര്യദിനത്തോടനുബന്ധിച്ച് റെബല് സ്റ്റാര് പ്രഭാസ് നായകനാകുന്ന ഏറ്റവും പുതിയ ചിത്രമായ ‘ഫൗജി’യുടെ (Fauzi) റിലീസ് തീയതി പ്രഖ്യാപിച്ചു. ഹനു രാഘവപുടി സംവിധാനം ചെയ്യുന്ന ഈ ബ്രഹ്മാണ്ഡ ചിത്രം 2026 ഡിസംബര് 3-ന് ലോകമെമ്പാടുമുള്ള തിയേറ്ററുകളില് വമ്പന് റിലീസായി എത്തും. എക്സ് (ട്വിറ്റര്), ഇന്സ്റ്റാഗ്രാം തുടങ്ങിയ സമൂഹമാധ്യമങ്ങളിലൂടെയാണ് അണിയറപ്രവര്ത്തകര് ഈ വിവരം ഔദ്യോഗികമായി പുറത്തുവിട്ടത്.
‘സ്വാതന്ത്ര്യം ഒരു ആഘോഷമായി മാറുന്നതിന് മുമ്പ്, അതൊരു പോരാട്ടമായിരുന്നു! നമ്മുടെ നാളെയ്ക്ക് വേണ്ടി പോരാടിയ ഓരോ സൈനികന്റെയും (ഫൗജി) ആത്മാവിന് മുന്നില് സല്യൂട്ട് ചെയ്തുകൊണ്ട് ഏവര്ക്കും സ്വാതന്ത്ര്യദിനാശംസകള് നേരുന്നു,’ എന്ന ദേശഭക്തി നിറഞ്ഞ കുറിപ്പോടെയാണ് ചിത്രത്തിന്റെ പ്രഖ്യാപനം വന്നിരിക്കുന്നത്.
പ്രഭാസിനൊപ്പം വമ്പന് താരനിരയാണ് ചിത്രത്തില് അണിനിരക്കുന്നത്. ഇമാന്വി ആണ് ചിത്രത്തിലെ നായിക. ഇന്ത്യന് സിനിമയിലെ ഇതിഹാസ താരങ്ങളായ മിഥുന് ചക്രവര്ത്തി, ജയപ്രദ, അനുപം ഖേര് എന്നിവരും ചിത്രത്തില് സുപ്രധാന വേഷങ്ങളില് എത്തുന്നുണ്ട്.
പ്രമുഖ നിര്മ്മാണ കമ്പനികളായ മൈത്രി മൂവി മേക്കേഴ്സും ടി-സീരീസും (ഭൂഷണ് കുമാര്, കൃഷന് കുമാര്) സംയുക്തമായാണ് ഈ ബിഗ് ബജറ്റ് ചിത്രം നിര്മ്മിക്കുന്നത്. ശിവ് ചനാന, നീരജ് കല്യാണ് എന്നിവരും നിര്മ്മാണ പങ്കാളികളാണ്.