ചില കണക്കുകള് തീര്ക്കാന് കാലം കാത്തുവെക്കുന്നത് വലിയ നിയോഗങ്ങളാണ്. 2009-ല് ഡല്ഹിയിലെ രാഷ്ട്രീയ ഇടനാഴികളില് ഒരു തമിഴ് യുവാവ് കണ്ട സ്വപ്നങ്ങളെ ‘അനുഭവസമ്പത്തില്ല’ എന്ന ഒറ്റവാക്കില് തള്ളിക്കളഞ്ഞ അതേ കൈകള്, 17 വര്ഷങ്ങള്ക്കിപ്പുറം ചെന്നൈയിലെ സ്റ്റേഡിയത്തില് അതേ യുവാവിനെ മുഖ്യമന്ത്രിയായി വാഴ്ത്താന് എത്തിയിരിക്കുന്നു. ഇത് വെറുമൊരു സത്യപ്രതിജ്ഞയല്ല തമിഴ് മണ്ണില് വിജയ് എന്ന മെഗാ സൂപ്പര്സ്റ്റാര് ഒരു പുതിയ ചരിത്രമെഴുതുമ്പോള്, പഴയ തെറ്റുകള് തിരുത്തിക്കൊണ്ട് രാഹുല് ഗാന്ധി അരികില് നില്ക്കുന്ന അവിശ്വസനീയമായ ഒരു രാഷ്ട്രീയ പരിണാമത്തിന്റെ തുടക്കമാണ്.
തമിഴ്നാട് രാഷ്ട്രീയത്തില് പതിറ്റാണ്ടുകള് നീണ്ടുനിന്ന ദ്രാവിഡ ദ്വന്ദ്വയുദ്ധത്തിന് അന്ത്യം കുറിച്ചുകൊണ്ട് തമിഴക വെട്രി കഴകം (ടിവികെ) അധികാരത്തിലെത്തുമ്പോള്, ചെന്നൈയിലെ ജവഹര്ലാല് നെഹ്റു സ്റ്റേഡിയത്തില് നടന്ന സത്യപ്രതിജ്ഞാ ചടങ്ങ് വെറുമൊരു അധികാര കൈമാറ്റം മാത്രമായിരുന്നില്ല. മുഖ്യമന്ത്രിയായി വിജയ് സത്യപ്രതിജ്ഞ ചെയ്യുമ്പോള് അരികില് പുഞ്ചിരിയോടെ നിന്ന രാഹുല് ഗാന്ധിയുടെ സാന്നിധ്യം, ഇന്ത്യന് രാഷ്ട്രീയത്തിലെ തന്നെ ഏറ്റവും വലിയ കാവ്യനീതിയുടെ അടയാളമായി മാറുകയാണ്.
വിജയ് എന്ന സൂപ്പര്താരത്തിന്റെ രാഷ്ട്രീയ സ്വപ്നങ്ങള്ക്ക് അന്നത്തെ കോണ്ഗ്രസ് നേതൃത്വം നല്കിയ മറുപടി ഇന്ന് പരിശോധിക്കുമ്പോള് ചരിത്രപരമായ ഒരു പാളിച്ചയായി വിലയിരുത്തപ്പെടുന്നു. അന്ന് യാതൊരു നിബന്ധനകളുമില്ലാതെ പാര്ട്ടിയില് ചേരാന് ആഗ്രഹിച്ച വിജയ്യോട് യൂത്ത് കോണ്ഗ്രസ് തിരഞ്ഞെടുപ്പില് മത്സരിക്കാന് രാഹുല് ഗാന്ധി നിര്ദ്ദേശിക്കുകയായിരുന്നു. ഒരു സൂപ്പര്താരത്തെ കേവലം ഒരു സംഘടനാ പ്രവര്ത്തകനായി മാത്രം കാണാന് ശ്രമിച്ച ആ നീക്കം വിജയ്യെ പിന്തിരിപ്പിച്ചു. അന്ന് വിജയ് കോണ്ഗ്രസില് ചേര്ന്നിരുന്നെങ്കില് അദ്ദേഹം കോണ്ഗ്രസിന്റെ മുഖ്യമന്ത്രി സ്ഥാനാര്ത്ഥിയാകുമായിരുന്നു എന്ന വാദങ്ങള് ശക്തമാണ്. എന്നാല് ആ നിരാകരണം വിജയ്യെ സ്വന്തമായൊരു വഴി വെട്ടിത്തുറക്കാന് പ്രേരിപ്പിക്കുകയും, ഏഴ് പതിറ്റാണ്ടായി അധികാരത്തിന് പുറത്തായ തമിഴ്നാട് കോണ്ഗ്രസിന് അത് മറ്റൊരു നഷ്ടമായി മാറുകയും ചെയ്തു.
സമാനമായ രാഷ്ട്രീയ അബദ്ധങ്ങള് കോണ്ഗ്രസ് മുന്പും ആവര്ത്തിച്ചിട്ടുണ്ട് എന്നത് ഈ സാഹചര്യത്തില് പ്രസക്തമാണ്. ആന്ധ്രാപ്രദേശില് വൈ.എസ്. രാജശേഖര റെഡ്ഡിയുടെ മരണശേഷം ജഗന് മോഹന് റെഡ്ഡിയെ അവഗണിച്ചതും, അസമില് ഹിമാന്ത ബിശ്വ ശര്മ്മയെ തഴഞ്ഞതും കോണ്ഗ്രസിന് ആ സംസ്ഥാനങ്ങളില് വലിയ തിരിച്ചടിയാണ് നല്കിയത്. ജഗനും ശര്മ്മയും സ്വന്തം നിലയില് കരുത്താര്ജ്ജിച്ച് മുഖ്യമന്ത്രിമാരായപ്പോള് കോണ്ഗ്രസ് ആ സംസ്ഥാനങ്ങളുടെ രാഷ്ട്രീയ ഭൂപടത്തില് നിന്ന് അപ്രത്യക്ഷമായി. എന്നാല് തമിഴ്നാട്ടില് ഈ തെറ്റ് ആവര്ത്തിക്കാതിരിക്കാനുള്ള ജാഗ്രതയാണ് ഇപ്പോള് കോണ്ഗ്രസ് കാണിക്കുന്നത്. ഡിഎംകെയുമായുള്ള ദീര്ഘകാല സഖ്യം അവസാനിപ്പിച്ച് ടിവികെയുമായി കൈകോര്ത്തതിലൂടെ തങ്ങളുടെ രാഷ്ട്രീയ ഭാവി സുരക്ഷിതമാക്കാനാണ് രാഹുല് ഗാന്ധിയും സംഘവും ലക്ഷ്യമിടുന്നത്.
രാഹുല് ഗാന്ധിയും വിജയ്യും തമ്മിലുള്ള ബന്ധം ഇപ്പോള് കൂടുതല് ദൃഢമായി മാറിക്കഴിഞ്ഞു. തിരഞ്ഞെടുപ്പ് പ്രചാരണ കാലത്തുതന്നെ സ്റ്റാലിനൊപ്പം വേദി പങ്കിടാതെ വിജയ്യുമായി മൂന്ന് തവണയെങ്കിലും രാഹുല് സംസാരിച്ചത് വരാനിരിക്കുന്ന വലിയ മാറ്റത്തിന്റെ സൂചനയായിരുന്നു. മുന്പ് സ്റ്റാലിനെ വിശേഷിപ്പിക്കാന് ഉപയോഗിച്ചിരുന്ന ”സഹോദരന്” എന്ന പദം ഇപ്പോള് വിജയ്ക്കായി രാഹുല് മാറ്റിവെച്ചിരിക്കുന്നു. 2024-ല് തമിഴ്നാട്ടിലെ മുഴുവന് സീറ്റുകളും നേടിയ ഡിഎംകെ സഖ്യത്തെ മറികടന്നുകൊണ്ട് 2029-ലെ ലോക്സഭാ തിരഞ്ഞെടുപ്പില് ടിവികെ-കോണ്ഗ്രസ് സഖ്യം വലിയ തരംഗം സൃഷ്ടിക്കുമെന്നാണ് രാഷ്ട്രീയ നിരീക്ഷകരുടെ കണക്കുകൂട്ടല്.
നിലവില് കോണ്ഗ്രസിന്റെ അഞ്ച് എംഎല്എമാരുടെ പിന്തുണ ടിവികെ സര്ക്കാരിന്റെ നിലനില്പ്പിന് അനിവാര്യമാണെങ്കിലും, എഐഎഡിഎംകെയില് നിന്ന് കൂടുതല് പേര് വിജയ്ക്കൊപ്പം ചേരാന് സാധ്യതയുണ്ടെന്ന റിപ്പോര്ട്ടുകള് രാഷ്ട്രീയ കേന്ദ്രങ്ങളില് ചര്ച്ചയാകുന്നുണ്ട്. ഇത് വിജയ്യുടെ ഭരണത്തിന് കൂടുതല് സുരക്ഷിതത്വം നല്കും. ഏതായാലും, അനിശ്ചിതത്വത്തിന്റെ നൂല്പ്പാലത്തിലൂടെ നടന്ന് 92 മണിക്കൂറിനുള്ളില് ഭൂരിപക്ഷം ഉറപ്പിച്ച വിജയ്, തമിഴ്നാട് രാഷ്ട്രീയത്തില് ഒരു പുതിയ സൂര്യോദയത്തിന് തുടക്കമിട്ടിരിക്കുകയാണ്. സിനിമാ സ്ക്രീനിലെ മാസ് ഹീറോ പരിവേഷത്തില് നിന്ന് ഭരണാധികാരിയിലേക്കുള്ള വിജയ്യുടെ ഈ മാറ്റം ഇന്ത്യ ഉറ്റുനോക്കുന്ന ഒരു വലിയ രാഷ്ട്രീയ പരീക്ഷണമാണ്.