സംസ്ഥാനത്ത് തുടരുന്ന കനത്ത ചൂടിന് ആശ്വാസമേകി വിവിധയിടങ്ങളില് വേനല് മഴ എത്തിത്തുടങ്ങിയിരിക്കുന്നു. പകല് സമയങ്ങളില് ഉയര്ന്ന താപനില അനുഭവപ്പെടുമ്പോഴും രാത്രികാലങ്ങളില് ലഭിക്കുന്ന ഈ മഴ ജനങ്ങള്ക്ക് വലിയ ആശ്വാസമാണ് നല്കുന്നത്. വരും ദിവസങ്ങളിലും സംസ്ഥാനത്ത് ഒറ്റപ്പെട്ടയിടങ്ങളില് ഇടിമിന്നലോടു കൂടിയ മഴ തുടരുമെന്നും മണിക്കൂറില് 40 മുതല് 50 കിലോമീറ്റര് വരെ വേഗതയില് ശക്തമായ കാറ്റ് വീശാന് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കിയിട്ടുണ്ട്.
മെയ് എട്ടാം തീയതി വരെ കേരളത്തില് മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തല്. വരും മണിക്കൂറുകളില് തൃശൂര്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് നേരിയ മഴയ്ക്ക് സാധ്യതയുണ്ടെന്നും റിപ്പോര്ട്ടുകള് സൂചിപ്പിക്കുന്നു. അന്തരീക്ഷത്തില് കാര്മേഘങ്ങള് രൂപപ്പെട്ടു തുടങ്ങുമ്പോള് തന്നെ ജാഗ്രത പാലിക്കണമെന്നും മഴയ്ക്കൊപ്പം എത്തുന്ന കാറ്റ് നാശനഷ്ടങ്ങള്ക്ക് കാരണമായേക്കാമെന്നും അധികൃതര് അറിയിച്ചു.
ഇടിമിന്നല് അപകടകാരിയായതിനാല് പൊതുജനങ്ങള് പ്രത്യേക മുന്കരുതലുകള് സ്വീകരിക്കണമെന്ന് കാലാവസ്ഥാ വകുപ്പ് നിര്ദ്ദേശിക്കുന്നു. മനുഷ്യജീവനും വളര്ത്തുമൃഗങ്ങള്ക്കും പുറമെ വൈദ്യുത-ആശയവിനിമയ ശൃംഖലകള്ക്കും വീട്ടുപകരണങ്ങള്ക്കും ഇടിമിന്നല് നാശമുണ്ടാക്കാന് സാധ്യതയുണ്ട്. അതിനാല് കാര്മേഘം കണ്ടുതുടങ്ങുന്ന സമയം മുതല് തന്നെ ഇലക്ട്രോണിക് ഉപകരണങ്ങള് പ്രവര്ത്തിപ്പിക്കാതിരിക്കാനും സുരക്ഷിതമായ ഇടങ്ങളിലേക്ക് മാറാനും ശ്രദ്ധിക്കണമെന്ന് നിര്ദ്ദേശത്തില് പറയുന്നു.