യു.എ.ഇയില് വിസ കാലാവധി കഴിഞ്ഞാല് ആദ്യദിനം 250 ദിര്ഹവും തുടര്ന്നുള്ള ദിവസങ്ങളില് 50 ദിര്ഹം വീതവുമാണ് പിഴയെന്നത് സാധാരണക്കാരായ പ്രവാസികള്ക്ക് താങ്ങാനാവാത്ത പ്രതിസന്ധിയാണ് സൃഷ്ടിക്കുന്നത്
പ്രതിസന്ധിയിലായി പ്രവാസികള്; ഗള്ഫ് വിമാനങ്ങള് കൂട്ടത്തോടെ റദ്ദാക്കുന്നു, ഹജ്ജ് യാത്രകള് ഏപ്രില് 18 മുതല് പശ്ചിമേഷ്യയില് നിലനില്ക്കുന്ന കടുത്ത സംഘര്ഷാവസ്ഥയെത്തുടര്ന്ന് ഗള്ഫ് മേഖലയില് നിന്നുള്ള വിമാന സര്വീസുകള് കൂട്ടത്തോടെ റദ്ദാക്കുന്നത് മലയാളി പ്രവാസികളെ വലിയ ദുരിതത്തിലാക്കുന്നു. സംഘര്ഷം ആരംഭിച്ചതിനുശേഷം ഇന്ത്യന് വിമാനക്കമ്പനികള് മാത്രം പതിനായിരത്തോളം സര്വീസുകളാണ് ഇതുവരെ റദ്ദാക്കിയത്. പ്രതിദിനം 350-ഓളം സര്വീസുകള് നടന്നിരുന്ന സ്ഥാനത്ത് നിലവില് 80 മുതല് 90 വരെ വിമാനങ്ങള് മാത്രമാണ് സര്വീസ് നടത്തുന്നത്. വിമാനങ്ങള് റദ്ദാക്കിയതോടെ നാട്ടിലേക്ക് മടങ്ങാന് കഴിയാതെ വിസിറ്റിങ് വിസയില് എത്തിയ കുടുംബങ്ങള് കടുത്ത സാമ്പത്തിക ബാധ്യതയാണ് നേരിടുന്നത്. യു.എ.ഇയില് വിസ കാലാവധി കഴിഞ്ഞാല് ആദ്യദിനം 250 ദിര്ഹവും തുടര്ന്നുള്ള ദിവസങ്ങളില് 50 ദിര്ഹം വീതവുമാണ് പിഴയെന്നത് സാധാരണക്കാരായ പ്രവാസികള്ക്ക് താങ്ങാനാവാത്ത പ്രതിസന്ധിയാണ് സൃഷ്ടിക്കുന്നത്.കണ്ണൂര് സ്വദേശിയായ സാബിറിന്റെ അനുഭവം പ്രവാസികള് നേരിടുന്ന ദുരവസ്ഥയുടെ നേര്ചിത്രമാണ്. വിസിറ്റിങ് വിസയില് എത്തിയ കുടുംബത്തിന് വിമാനങ്ങള് റദ്ദായതിനെത്തുടര്ന്ന് ഒരു ദിവസം അധികം തങ്ങേണ്ടി വന്നപ്പോള് പിഴയിനത്തില് മാത്രം 28,000 രൂപയോളമാണ് ചിലവായത്. പിന്നീട് നാട്ടിലേക്ക് വന് വിമാന നിരക്ക് നല്കേണ്ടി വരുമെന്നതിനാല് ഡല്ഹി വഴി ട്രെയിനിലാണ് ഇവര് കേരളത്തിലെത്തിയത്. ജസീറ എയര്വേയ്സ് ഉള്പ്പെടെയുള്ള കമ്പനികള് കേരളത്തിലേക്കുള്ള സര്വീസുകള് മെയ് 15 വരെ നിര്ത്തിവെച്ചത് യാത്രക്കാരെ കൂടുതല് വലയ്ക്കുന്നുണ്ട്. വേനലവധിക്ക് നാട്ടിലേക്ക് പോകാന് തയ്യാറെടുക്കുന്ന പ്രവാസികള്ക്ക് ഇത് വലിയ തിരിച്ചടിയാണ്.അതേസമയം, ആശങ്കകള്ക്കിടയിലും ഈ വര്ഷത്തെ ഹജ്ജ് തീര്ത്ഥാടനത്തിനുള്ള ഒരുക്കങ്ങള് പൂര്ത്തിയായതായി അധികൃതര് അറിയിച്ചു. ഇന്ത്യയില് നിന്നുള്ള ആദ്യ ഹജ്ജ് വിമാനം ഏപ്രില് 18-ന് മുംബൈയില് നിന്ന് പുറപ്പെടും. കേരളത്തില് നിന്നുള്ള തീര്ത്ഥാടകരുടെ ആദ്യ സംഘം ഏപ്രില് 30-ന് കൊച്ചിയില് നിന്ന് ജിദ്ദയിലേക്ക് തിരിക്കും. ഇത്തവണ ഹജ്ജ് കമ്മിറ്റി വഴി 1,22,580 പേരും സ്വകാര്യ ഗ്രൂപ്പുകള് വഴി 52,000 പേരുമാണ് ഇന്ത്യയില് നിന്ന് ഹജ്ജിനെത്തുന്നത്. സുരക്ഷാ കാരണങ്ങളാല് ഹാജിമാരുടെ താമസസ്ഥലത്ത് പാചകം അനുവദിക്കില്ലെന്നും പ്രത്യേക കമ്പനികള് വഴി ഭക്ഷണം വിതരണം ചെയ്യുമെന്നും അധികൃതര് വ്യക്തമാക്കി. ഹജ്ജ് കര്മ്മങ്ങള് കഴിഞ്ഞ് ജൂണ് രണ്ട് മുതലായിരിക്കും മടക്കയാത്ര ആരംഭിക്കുക.