സംസ്ഥാനത്തെ സര്ക്കാര്/എയിഡഡ് സ്കൂളുകളിലെ നിയമനങ്ങള്ക്കുള്ള കെ-ടെറ്റ് യോഗ്യതയുമായി ബന്ധപ്പെട്ട് പുറപ്പെടുവിച്ച പുതിയ നിര്ദ്ദേശങ്ങള് നടപ്പിലാക്കുന്നത്, കൂടുതല് സ്പഷ്ടീകരണം ആവശ്യമായതിനാല്, ഇനിയൊരു ഉത്തരവ് ഉണ്ടാകുന്നതുവരെ മരവിപ്പിച്ചതായി പൊതുവിദ്യാഭ്യാസ വകുപ്പ് മന്ത്രി വി. ശിവന്കുട്ടി വാര്ത്താസമ്മേളനത്തില് അറിയിച്ചു.
സുപ്രീം കോടതിയുടെ പുതിയ വിധിന്യായത്തിന്റെ പശ്ചാത്തലത്തില്, 2010 ഏപ്രില് 1ന് മുന്പ് സര്വീസില് പ്രവേശിച്ച അധ്യാപകര്ക്കിടയില് ഉണ്ടായിട്ടുള്ള ആശങ്കകള് സര്ക്കാര് ഗൗരവമായി കാണുന്നുവെന്നു മന്ത്രി പറഞ്ഞു.
2010 ഏപ്രില് 1ന് മുന്പ് സര്വീസില് പ്രവേശിച്ച അധ്യാപകരെ പ്രതികൂലമായി ബാധിക്കുന്നതാണ് സുപ്രീം കോടതി വിധി. അന്നത്തെ നിയമന ചട്ടങ്ങള് പാലിച്ചുകൊണ്ട് ജോലിയില് പ്രവേശിച്ച അധ്യാപകരുടെ അവകാശങ്ങള് സംരക്ഷിക്കാന് സര്ക്കാര് പ്രതിജ്ഞാബദ്ധമാണ്. അതിനാല്, ഈ വിധിക്കെതിരെ സുപ്രീം കോടതിയില് റിവ്യൂ പെറ്റീഷന് ഫയല് ചെയ്യാന് സര്ക്കാര് തീരുമാനിച്ചിട്ടുണ്ട്.
വിദ്യാഭ്യാസ അവകാശ നിയമം ലക്ഷ്യമിടുന്നത് ഗുണമേന്മയുള്ള വിദ്യാഭ്യാസമാണ് . എന്നാല്, ദീര്ഘകാലമായി സേവനമനുഷ്ഠിക്കുന്ന, മികച്ച അനുഭവസമ്പത്തുള്ള അധ്യാപകരെ പിരിച്ചുവിടുന്നത് ഗുണനിലവാരത്തെ തകര്ക്കുകയേ ഉള്ളൂ . കെ-ടെറ്റ് നിലവില് വരുന്നതിന് മുന്പ് തന്നെ കേരളം വിദ്യാഭ്യാസ നിലവാരത്തിലും സാക്ഷരതയിലും മുന്പന്തിയിലായിരുന്നു എന്നത് നാം ഓര്ക്കണം. അന്നത്തെ യോഗ്യതാ മാനദണ്ഡങ്ങള് പാലിച്ചാണ് ഈ അധ്യാപകര് കുട്ടികള്ക്ക് മികച്ച വിദ്യാഭ്യാസം നല്കിപ്പോന്നത്.
കെ-ടെറ്റ് പരീക്ഷ കേരളത്തില് ആരംഭിച്ചത് 2012-ല് മാത്രമാണ്. അതിനും വര്ഷങ്ങള്ക്ക് മുന്പ് (2010-ന് മുന്പ്) ജോലിയില് പ്രവേശിച്ചവരോട്, ജോലിയില് കയറുമ്പോള് ഇല്ലാതിരുന്ന ഒരു യോഗ്യത ഇപ്പോള് നിര്ബന്ധമാണ് എന്ന് പറയുന്നത് സ്വാഭാവിക നീതിക്ക് നിരക്കുന്നതല്ല. കെ-ടെറ്റ് വരുന്നതിന് മുന്പ് സര്വീസില് കയറിയവരെയും അതിനുശേഷം വന്നവരെയും ഒരേ തട്ടില് കാണുന്നത് ഭരണഘടനയുടെ ആര്ട്ടിക്കിള് 14-ന്റെ ലംഘനമാണെന്ന് സര്ക്കാര് വിലയിരുത്തുന്നു.
മുന്കാല പ്രാബല്യത്തോടെയുള്ള ഇത്തരം വിധികള് നടപ്പിലാക്കുന്നത് അനേകം പേരുടെ തൊഴില് നഷ്ടപ്പെടുന്നതിനും വലിയ സാമ്പത്തിക-സാമൂഹിക പ്രത്യാഘാതങ്ങള്ക്കും കാരണമാകുമെന്നു മന്ത്രി പറഞ്ഞു.
നിലവില് യോഗ്യത നേടാന് ആഗ്രഹിക്കുന്നവര്ക്കായി 2026 ഫെബ്രുവരിയില് കെ-ടെറ്റ് പരീക്ഷ നടത്തുന്നതിന് വിജ്ഞാപനം പുറപ്പെടുവിച്ചിട്ടുണ്ട്. എന്നാല്, 2010-ന് മുന്പ് നിയമിതരായ ഒരാള്ക്ക് പോലും തൊഴില് നഷ്ടപ്പെടാതിരിക്കാന് ആവശ്യമായ എല്ലാ നിയമപരമായ ഇടപെടലുകളും സര്ക്കാര് നടത്തും. അതിനാല് അധ്യാപകര് ആശങ്കപ്പെടേണ്ടതില്ല.
ഈ വിഷയത്തില് അധ്യാപക സംഘടനകളുമായും നിയമവിദഗ്ധരുമായും ചര്ച്ച നടത്തിയ ശേഷം റിവ്യൂ പെറ്റീഷന് നല്കുന്ന നടപടികള് വേഗത്തിലാക്കാന് വകുപ്പ് ഉദ്യോഗസ്ഥര്ക്ക് നിര്ദ്ദേശം നല്കിയിട്ടുണ്ടെന്നു മന്ത്രി കൂട്ടിച്ചേര്ത്തു.