സംസ്ഥാനത്തെ വഖഫ് സ്വത്തുകള്, കേന്ദ്ര വഖഫ് ഭേദഗതി നിയമപ്രകാരം ഉമീദ് സെന്ട്രല് പോര്ട്ടലില് രജിസ്റ്റര് ചെയ്യാനുള്ള സമയപരിധി വഖഫ് ട്രൈബ്യൂണല് അഞ്ച് മാസത്തേക്കുകൂടി നീട്ടി നല്കിയതായും ഈ അവസരം മുഴുവന് വഖഫ് സ്ഥാപനങ്ങളും മുതവല്ലിമാരും നിര്ബന്ധമായും ഉപയോഗപ്പെടുത്തണമെന്നും സംസ്ഥാന കായിക – ന്യൂനപക്ഷ ക്ഷേമ – വഖഫ് – ഹജ്ജ് വകുപ്പ് മന്ത്രി വി. അബ്ദുറഹിമാന് അഭ്യര്ത്ഥിച്ചു.
ഉമീദ് പോര്ട്ടലില് വഖ്ഫുകള് രജിസ്റ്റര് ചെയ്യാനുള്ള സമയപരിധി ഡിസംബര് 6 ന് അവസാനിച്ചതിനെത്തുടര്ന്ന് പലര്ക്കും നടപടികള് പൂര്ത്തിയാക്കാന് കഴിഞ്ഞിട്ടില്ല. ഈ സാഹചര്യത്തില് സംസ്ഥാന വഖ്ഫ് വകുപ്പും വഖ്ഫ് ബോര്ഡും ഇടപെടല് നടത്തിയാണ് വഖഫ് ട്രൈബ്യൂണലിനെ സമീപിച്ച് സമയം നീട്ടി വാങ്ങിയത്. സംസ്ഥാന വഖഫ് ബോര്ഡ് സുപ്രീംകോടതിയെ സമീപിച്ചപ്പോള് സമയപരിധി നീട്ടിക്കിട്ടാന് വഖഫ് ട്രൈബ്യൂണലിനെ സമീപിക്കാനായിരുന്നു നിര്ദേശം. നിലവില് വഖഫ് ബോര്ഡില് രജിസ്റ്റര് ചെയ്ത സ്ഥാപനങ്ങള്ക്ക് ട്രൈബ്യൂണല് ഉത്തരവ് പ്രകാരം രജിസ്ട്രേഷന് പൂര്ത്തിയാക്കാം.
അഞ്ചുമാസം സമയമുണ്ടെങ്കിലും വഖഫ് മുത്തവല്ലിമാര് മൂന്ന് മാസത്തിനകംതന്നെ പോര്ട്ടലില് വഖഫ് സ്വത്ത് വിവരങ്ങളും രേഖകളും ചേര്ക്കാന് ശ്രമിക്കണമെന്നും ബാക്കി രണ്ടുമാസം രേഖകള് പരിശോധിച്ച് ബോര്ഡിന് അംഗീകാര നടപടികള് പൂര്ത്തീകരിക്കാന് വേണ്ടിവരുമെന്നും മന്ത്രി പറഞ്ഞു.
ബോര്ഡില് ഇതുവരെ രജിസ്റ്റര് ചെയ്യാത്ത വഖഫ് സ്ഥാപനങ്ങള്ക്കും ന്യൂ വഖഫ് ഓപ്ഷന് വഴി പോര്ട്ടലില് അപേക്ഷിക്കാന് കഴിയും. ഇതിനായി എല്ലാ വഖഫ് ബോര്ഡ് ഡിവിഷന് ഓഫിസുകളിലും ആരംഭിക്കുന്ന ഹെല്പ് ഡെസ്കുകള് വഖഫ് മുതവല്ലിമാര് ഉപയോഗപ്പെടുത്തണമെന്നും മന്ത്രി അഭ്യര്ത്ഥിച്ചു.