തിരുവനന്തപുരം: തദ്ദേശ തിരഞ്ഞെടുപ്പില് ശബരിമല പശ്ചാത്തലമാക്കി തയ്യാറാക്കിയ പ്രചാരണ പോസ്റ്ററുകളെ സംബന്ധിച്ചുള്ള പരാതികള് വിശദമായി പരിശോധിക്കാന് സംസ്ഥാന തിരഞ്ഞെടുപ്പ് കമ്മീഷന് കളക്ടര്മാര്ക്ക് നിര്ദേശം നല്കി. ഇത്തരം പ്രചാരണ പോസ്റ്ററുകള് മാതൃകാ പെരുമാറ്റച്ചട്ട ലംഘനത്തിന്റെ പരിധിയില് വരുമെന്നതിനാലാണ് തിരഞ്ഞെടുപ്പ് കമ്മീഷന് ഈ വിഷയത്തില് അടിയന്തരമായി നടപടി സ്വീകരിക്കാന് ആവശ്യപ്പെട്ടത്.
മാതൃകാ പെരുമാറ്റച്ചട്ടത്തിലെ വ്യവസ്ഥകള് അനുസരിച്ച്, പോസ്റ്ററുകളും ലഘുലേഖകളും അച്ചടിക്കുമ്പോള് അത് ആരാണ് അച്ചടിച്ചതെന്ന് വ്യക്തമാക്കണം. ഇത് പാലിക്കാതെയും മതപരമായ ചിഹ്നങ്ങള് ഉപയോഗിച്ചുകൊണ്ടുമുള്ള ലഘുലേഖകള് പ്രചരിക്കുന്നുണ്ട് എന്ന പരാതികളെത്തുടര്ന്നാണ് തിരഞ്ഞെടുപ്പ് കമ്മീഷന് ഇപ്പോള് നടപടിക്കൊരുങ്ങുന്നത്. ഇതോടൊപ്പം, തിരഞ്ഞെടുപ്പ് പ്രചാരണങ്ങളുമായി ബന്ധപ്പെട്ട ശബ്ദ നിയന്ത്രണത്തെക്കുറിച്ചുള്ള പരാതികളില് കര്ശന നിലപാട് സ്വീകരിക്കാനും തിരഞ്ഞെടുപ്പ് കമ്മീഷന് നിര്ദേശം നല്കിയിട്ടുണ്ട്.
തിരഞ്ഞെടുപ്പ് കമ്മീഷണറുടെ നിര്ദേശപ്രകാരം, പരസ്യപ്രചാരണം അവസാനിക്കുന്ന സമയത്ത് രാഷ്ട്രീയ പാര്ട്ടികള് നടത്തുന്ന കൊട്ടിക്കലാശം പോലുള്ള പരിപാടികള് സമാധാനപരമായിരിക്കണം. ഈ അവസരത്തില് ക്രമസമാധാന പ്രശ്നങ്ങള് ഉണ്ടാകുന്നില്ലെന്ന് ഉറപ്പാക്കണമെന്നും കമ്മീഷന് നിര്ദേശം നല്കിയിട്ടുണ്ട്.