പാലക്കാട് ജില്ലയിലെ പട്ടാമ്പി ബ്ലോക്ക് പഞ്ചായത്ത് ഓഫീസ് വളപ്പില് നിന്നും കഞ്ചാവ് ചെടി കണ്ടെത്തി. തിരുവേഗപ്പുറയില് ബ്ലോക്ക് പഞ്ചായത്ത് ഓഫീസ് കെട്ടിടത്തോട് ചേര്ന്നാണ് ഈ ചെടി നട്ടുവളര്ത്തിയത്. സംഭവം ശ്രദ്ധയില്പ്പെട്ടതിനെ തുടര്ന്ന് എക്സൈസ് അധികൃതര് സ്ഥലത്തെത്തി ചെടി നശിപ്പിച്ചു. പട്ടാമ്പി ബ്ലോക്കിന് കീഴില് പ്രവര്ത്തിക്കുന്ന മഹിളാ സമാജത്തിന്റെ കെട്ടിടത്തിന് മുന്വശത്തുനിന്നാണ് ഈ കഞ്ചാവ് ചെടി കണ്ടെടുത്തത്.
പിഴുതെടുത്ത കഞ്ചാവ് ചെടിക്ക് ഏകദേശം 29 സെന്റീമീറ്ററോളം നീളമുണ്ടായിരുന്നുവെന്ന് എക്സൈസ് ഉദ്യോഗസ്ഥര് വ്യക്തമാക്കി. അതേസമയം, ഈ ചെടി ഇവിടെ നട്ടുവളര്ത്തിയത് ആരാണെന്നതിനെക്കുറിച്ച് ഇതുവരെ യാതൊരു വിവരവും ലഭിച്ചിട്ടില്ല. പട്ടാമ്പി എക്സൈസ് റേഞ്ച് ഇന്സ്പെക്ടര് എച്ച്. വിനുവിന്റെ നേതൃത്വത്തിലുള്ള സംഘമാണ് കഞ്ചാവ് ചെടി കണ്ടെത്തിയതും നശിപ്പിച്ചതും. അസിസ്റ്റന്റ് എക്സൈസ് ഇന്സ്പെക്ടര് സല്മാന് റസാലി പി.കെ., കെ.ഒ. പ്രസന്നന്, സിവില് എക്സൈസ് ഓഫീസര്മാരായ നന്ദു, അനൂപ് രാജ് എന്നിവരും സംഘത്തില് ഉണ്ടായിരുന്നു.