തിരുവനന്തപുരം: തിരുവനന്തപുരം എസ്.എ.ടി. ആശുപത്രിയില് പ്രസവത്തിനെത്തിയ യുവതി ആശുപത്രിയില് നിന്നുള്ള അണുബാധയെ തുടര്ന്ന് മരിച്ചെന്ന പരാതിയില് ആരോഗ്യവകുപ്പ് വിശദമായ അന്വേഷണത്തിന് ഉത്തരവിട്ടു. തിരുവനന്തപുരം മെഡിക്കല് കോളേജ് ആശുപത്രിക്ക് പുറത്തുനിന്നുള്ള വിദഗ്ദ്ധര് ഉള്പ്പെട്ട സംഘമാണ് കേസ് അന്വേഷിക്കുക. ക്രിട്ടിക്കല് കെയര്, ഇന്ഫെക്ഷന് ഡിസീസ്, ഗൈനക്കോളജി, ഡെര്മറ്റോളജി വിഭാഗങ്ങളിലെ വിദഗ്ദ്ധര് അന്വേഷണ സംഘത്തില് ഉണ്ടാകും. പ്രത്യേക സംഘത്തെ നിയോഗിച്ച്, രണ്ട് ദിവസത്തിനകം റിപ്പോര്ട്ട് സമര്പ്പിക്കണം എന്ന് ആരോഗ്യമന്ത്രി നിര്ദ്ദേശം നല്കിയിട്ടുണ്ട്.
അതേസമയം കഴിഞ്ഞ 22-ന് പ്രസവത്തിനായി തിരുവനന്തപുരം എസ്.എ.ടി. ആശുപത്രിയില് പ്രവേശിപ്പിച്ച കരിക്കകം സ്വദേശിനി ശിവപ്രിയ (26) ഇന്നലെയാണ് മള്ട്ടി സ്പെഷ്യാലിറ്റി വിഭാഗത്തില് ചികിത്സയിലിരിക്കെ മരിച്ചത്. ആശുപത്രിയില് നിന്നുള്ള അണുബാധയാണ് മരണത്തിന് കാരണമായതെന്നാണ് ബന്ധുക്കളുടെ പ്രധാന ആരോപണം. ശിവപ്രിയയുടെ മൃതദേഹം ഇന്ന് പോസ്റ്റ്മോര്ട്ടം നടപടികള് പൂര്ത്തിയാക്കിയ ശേഷം ബന്ധുക്കള്ക്ക് വിട്ടുനല്കും.