കൊല്ലം: തിരുമ്മല് ചികിത്സയുടെ മറവില് സ്ത്രീയെ പീഡിപ്പിക്കാന് ശ്രമിച്ചയാള് പിടിയില്. കൊല്ലം ജില്ലയിലെ കരുനാഗപ്പള്ളിയിലാണ് സംഭവം. ചേര്ത്തല തുറവൂര് പള്ളിത്തോട് സ്വദേശിയായ ചന്ദ്രബാബു എന്ന സഹലേഷ് കുമാറിനെയാണ് പൊലീസ് അറസ്റ്റ് ചെയ്തത്. കണ്ണൂര് സ്വദേശിനിയായ സ്ത്രീയെയാണ് ഇയാള് പീഡിപ്പിക്കാന് ശ്രമിച്ചത്.
കരുനാഗപ്പള്ളി കോടതി സമുച്ചയത്തിന് സമീപമുള്ള വീട്ടില് ഇയാള് തിരുമ്മല് കേന്ദ്രം നടത്തി വരികയായിരുന്നു. എത്ര പഴക്കമുള്ള വേദനയും ഒറ്റ ദിവസം കൊണ്ട് മാറ്റി നല്കാമെന്നായിരുന്നു ഇയാളുടെ അവകാശവാദം. ഇയാളുടെ സ്ഥാപനം സംബന്ധിച്ച് സമൂഹമാധ്യമങ്ങളിലെ പരസ്യം കണ്ടാണ് കണ്ണൂര് സ്വദേശിനി പ്രതിയെ സമീപിക്കുന്നത്. നടുവേദനയുടെ ചികിത്സയ്ക്കായി എത്തിയ സ്ത്രീയെ 54 കാരനായ പ്രതി ലൈംഗികമായി പീഡിപ്പിക്കാന് ശ്രമിക്കുകയായിരുന്നു. കരുനാഗപ്പള്ളി പൊലീസിന് ലഭിച്ച പരാതിയുടെ അടിസ്ഥാനത്തിലാണ് പ്രതിയെ പിടികൂടിയത്.