കണ്ണൂര്: തെരുവുനായ ശല്യത്തിനെതിരായ നാടകത്തിനിടെ നാടക കലാകാരനെ നായ കടിച്ചു. ആക്രമണം നാടകത്തിന്റെ ഭാഗമാണെന്ന് കരുതി കാണികള് പ്രതികരിക്കാതിരുന്നത് രംഗം കൂടുതല് രൂക്ഷമാക്കി. മയ്യില് കണ്ടക്കൈപ്പറമ്പ് കൃഷ്ണപിള്ള വായനശാല ഞായറാഴ്ച്ച രാത്രി എട്ടിന് സംഘടിപ്പിച്ച ‘പേക്കോലം’ എന്ന ഏകാംഗനാടകത്തിന്റെ അവതരണത്തിനിടെയാണ് സംഭവം.
നാടക പ്രവര്ത്തകനായ കണ്ടക്കൈയിലെ പി. രാധാകൃഷ്ണനാണ് നായയുടെ കടിയേറ്റത്. രാധാകൃഷ്ണന് മൈക്കിലൂടെ നായ കുരയ്ക്കുന്നത് പോലെയുള്ള ശബ്ദമുണ്ടാക്കിയതോടെ, തെരുവിലുണ്ടായിരുന്ന നായ്ക്കള് വേദിയിലേക്ക് കയറി ഇദ്ദേഹത്തെ ആക്രമിക്കുകയായിരുന്നു. നാടകത്തിനിടെ നായ ആക്രമണമുണ്ടായപ്പോള് അതും നാടകത്തിന്റെ ഭാഗമാണെന്നായിരുന്നു കാണികള് ആദ്യം കരുതിയത്. പിന്നീട് അത് നാടകത്തിന്റെ ഭാഗമല്ലെന്നും തെരുവ് നായ ആക്രമണമാണെന്നും മനസിലാക്കിയ വായനാശാല പ്രവര്ത്തകരാണ് രാധാകൃഷ്ണനെ ആശുപത്രിയില് പ്രവേശിപ്പിച്ചത്. നായയുടെ കടിയേറ്റെങ്കിലും നാടകം പൂര്ത്തിയാക്കിയ ശേഷമാണ് രാധാകൃഷ്ണന് ചികിത്സ തേടാന് തയ്യാറായത്. തുടര്ന്ന് കണ്ണൂര് ഗവ. മെഡിക്കല് കോളേജില് ഇദ്ദേഹത്തിന് ചികിത്സ നല്കി.