വര്ക്കല: വര്ക്കല ബീച്ചില് കുളിക്കാനിറങ്ങിയ ഗ്രീക്ക് പൗരനെ വാട്ടര് സ്പോര്ട്സ് ജീവനക്കാര് ക്രൂരമായി മര്ദ്ദിച്ചതായി പരാതി. ഗ്രീസ് സ്വദേശിയായ റോബര്ട്ടിനാണ് സാരമായി പരിക്കേറ്റത്. ഇന്ന് രാവിലെ ഒന്പത് മണിയോടെയാണ് സംഭവം. കഴിഞ്ഞ ദിവസം ബീച്ചില് റോബര്ട്ടിന്റെ മൊബൈല് ഫോണ് നഷ്ടപ്പെട്ടിരുന്നു. ഇത് അന്വേഷിച്ച് റോബര്ട്ട് ബീച്ചില് എത്തുകയും തുടര്ന്ന് കടലില് കുളിക്കാന് ഇറങ്ങുകയുമായിരുന്നു. എന്നാല്, വാട്ടര് സ്പോര്ട്സ് നടത്തിപ്പുകാരായ തൊഴിലാളികള് ഇത് തടഞ്ഞതോടെ ഇരുവരും തമ്മില് വാക്കേറ്റമുണ്ടായി.
തുടര്ന്ന് റോബര്ട്ടിനെ തൊഴിലാളികള് ക്രൂരമായി മര്ദ്ദിക്കുകയായിരുന്നു. കടലിലും മണലിലുമിട്ട് വലിച്ചിഴച്ച് മര്ദ്ദിച്ചു. പാപനാശം പോലീസ് എയ്ഡ് പോസ്റ്റിന്റെ മുന്നിലിട്ടും ഇദ്ദേഹത്തെ മര്ദ്ദിച്ചു. നാട്ടുകാര് ഇടപെട്ടതിനെത്തുടര്ന്നാണ് അക്രമികള് പിന്മാറിയത്.
ടൂറിസം പോലീസെത്തി പരിക്കേറ്റ റോബര്ട്ടിനെ വര്ക്കല താലൂക്ക് ആശുപത്രിയിലേക്ക് മാറ്റി. വിദേശിയുടെ കണ്ണിന് ഗുരുതരമായ പരിക്കേറ്റിട്ടുണ്ട്. സംഭവത്തില് പോലീസില് പരാതി നല്കുമെന്ന് റോബര്ട്ട് പ്രതികരിച്ചു.