തിരുവനന്തപുരം: കേരള ക്രിക്കറ്റ് ലീഗില് (കെ.സി.എല്.) ആരാധകരെ ആവേശത്തിലാഴ്ത്തിക്കൊണ്ട് കാലിക്കറ്റ് ഗ്ലോബ് സ്റ്റാര്സിന്റെ യുവതാരം കൃഷ്ണ ദേവന്. നിലവിലെ ചാമ്പ്യന്മാരായ കൊല്ലം ഏരീസിനെതിരെ അവസാന അഞ്ച് പന്തിലും സിക്സര് പറത്തിയാണ് കൃഷ്ണദേവന്റെ തട്ടുപൊളിപ്പന് പ്രകടനം. വെറും 11 പന്തുകള് മാത്രം നേരിട്ട കൃഷ്ണ ദേവന് 7 സിക്സറുകളുടെയും ഒരു ഫോറിന്റെയും അകമ്പടിയോടെ 49 റണ്സാണ് അതിവേഗം അടിച്ചുകൂട്ടിയത്. 17-ാം ഓവറിലെ 4-ാം പന്തില് ടീം സ്കോര് 150 ലെത്തിയ ഉടന് അന്ഫല് പുറത്തായപ്പോഴാണ് യുവതാരം കൃഷ്ണ ദേവന് ക്രീസിലെത്തിയത്. എന്.എസ്. അജയഘോഷ് എറിഞ്ഞ 18-ാം ഓവറിലെ മൂന്നാം പന്തില് എം.എസ് ധോണിയുടെ വിഖ്യാതമായ ഹെലികോപ്റ്റര് ഷോട്ടിനെ അനുസ്മരിപ്പിക്കുന്ന ബാറ്റിംഗ് ശൈലിയിലൂടെയാണ് കൃഷ്ണ ദേവന് ആദ്യ സിക്സര് ഗ്യാലറിയിലെത്തിച്ചത്. ഈ ഓവറില് ഒരു സിക്സറും ഒരു ഫോറും ഉള്പ്പെടെ കൃഷ്ണ ദേവന് നേടിയ 18 റണ്സ് കാണാനിരിക്കുന്ന പൂരത്തിന്റെ ട്രെയ്ലറായിരുന്നു.
ഷറഫുദ്ദീന് എറിഞ്ഞ 19-ാം ഓവറിലെ ആദ്യ പന്തില് അഖില് സ്കറിയ സിംഗിള് നേടി കൃഷ്ണ ദേവന് സ്ട്രൈക്ക് കൈമാറി. പിന്നെ ഗ്രീന് ഫീല്ഡ് കണ്ടത് കൃഷ്ണ ദേവന്റെ കട്ടക്കലിപ്പായിരുന്നു. ഷറഫുദ്ദീന് എറിഞ്ഞ അവസാന അഞ്ച് പന്തുകളും കൃഷ്ണ ദേവന് നിലം തൊടാതെ സിക്സറുകളാക്കി മാറ്റിയ , അത്യപൂര്വ്വ കാഴ്ച കാണികളെ ആവേശത്തിന്റെ കൊടുമുടിയിലെത്തിച്ചു.പൊടുന്നനെ ക്രീസിലെത്തി അങ്കക്കലി പൂണ്ട കൃഷ്ണ ദേവന്റെ മാസ്മരിക ബാറ്റിംഗ് മത്സരത്തിന്റെ ഗതി കോഴിക്കോടിന് അനുകൂലമാക്കി.
സല്മാന് നിസാറിന്റെ കട്ടക്കലിപ്പ് ഇന്നിങ്സിന് ശേഷം ക്രിക്കറ്റ് പ്രേമികള്ക്കിടയില് വലിയ ചര്ച്ചകള്ക്ക് വഴിവെച്ചിരിക്കുകയാണ് കൃഷ്ണ ദേവന്റെ കലി പൂണ്ട ഇന്നിംഗ്സും.