പൊവ്വല് എല്.ബി.എസ് എഞ്ചിനീയറിംഗ് കോളജില് എന്.എസ്.എസ് യൂണിറ്റിന്റെയും ഹരിത കേരള മിഷന്റെയും നേതൃത്വത്തില് ‘സുഹൃത്തിന് ഒരു വൃക്ഷത്തൈ തൈ’ എന്ന ആശയവുമായി സൗഹൃദ ദിനത്തോടനുബന്ധിച്ച് വൃക്ഷ തൈ നടല് പരിപാടി സംഘടിപ്പിച്ചു. കോളേജ് പ്രിന്സിപ്പല് ഡോ ടി.മുഹമ്മദ് ഷെക്കൂര് ബയോ പാര്ക്കില് ആദ്യ വൃക്ഷത്തൈ നട്ടു. ജില്ലാ ഇന്ഫര്മേഷന് ഓഫീസര് എം. മധുസൂദനന് മുഖ്യാതിഥിയായിരുന്നു. ഹരിത കേരളം മിഷന് റിസോഴ്സ് പേഴ്സണ് ലോഹിതാക്ഷന് എന്.എസ്.എസ് പോഗ്രാം ഓഫീസര് അരുണ് എസ് മാത്യു ബയോ ഡൈവേഴ്സിറ്റി പാര്ക്കിന്റെ ചുമതലയുള്ള ഫാക്കല്റ്റി പ്രൊഫ ഒ.എം വിനോദ് ,എന്.ആര്.പി.എഫ് ട്രീ ടാഗിംഗ് റീജിയണല് കോര്ഡിനേറ്റര് വി.മഞ്ജു, എന്.ആര്.പി.എഫ് കോര്ഡിനേറ്റര്മാരായ പ്രജ്വല് കൃഷ്ണ, ഗോകുല്, ജിത്തു –
അസിസ്റ്റന്റ് വൊളന്റിയര് സെക്രട്ടറി,നവീന എന്നിവര് സംസാരിച്ചു.
ലോക സൗഹൃദ ദിനമായ ആഗസ്റ്റ് മൂന്നിനാണ് ഒരു തൈ നടാം എന്ന ഈ പരിപാടി ആരംഭിച്ചത്. സുഹൃത്തുക്കള് തമ്മില് വൃക്ഷത്തൈകളുടെ കൈമാറല് പരിപാടിയാണിത്
ഹരിതകേരളം മിഷനാണ് ഇതിനു നേതൃത്വം നല്കുന്നത്. സൗഹൃദം മഹാവൃക്ഷമായി വളരട്ടെ എന്ന ആശയവുമായി ഒരു തൈ നടാം ജനകീയ വൃക്ഷവത്ക്കരണ ക്യാമ്പയിന്റെ ഭാഗമായാണ് പരിപാടി സംഘടിപ്പിക്കുന്നത്. സംസ്ഥാനത്തെ സ്കൂളുകള്, കലാലയങ്ങള്, ഓഫീസുകള്, സ്ഥാപനങ്ങള്, വായനശാലകള് ക്ലബ്ബുകള്, സന്നദ്ധ സംഘടനകള്, കുടുംബശ്രീ അയല്ക്കൂട്ടങ്ങള്, മാധ്യമ സ്ഥാപനങ്ങള് തുടങ്ങിയ സ്ഥലങ്ങളില് സുഹൃത്തുക്കള്ക്ക് നട്ടുവളര്ത്താന് വൃക്ഷത്തൈകള് പരസ്പരം കൈമാറിയാണ് പരിപാടി സംഘടിപ്പിക്കുന്നത്. ഹരിത കേരളം മിഷന്റെ ആഭിമുഖ്യത്തില് സംസ്ഥാനത്ത് സൃഷ്ടിച്ച പച്ചത്തുരുത്തുകളിലും തൈകള് നട്ട് പിടിപ്പിച്ചു. പുതിയ നിരവധി പച്ചത്തുരുത്തുകള്ക്കും തുടക്കം കുറിച്ചു. പരിസ്ഥിതി പുനഃസ്ഥാപനം, നെറ്റ് സീറോ കാര്ബണ് കേരളം എന്നീ ലക്ഷ്യങ്ങള് മുന്നിര്ത്തിയാണ് പരിപാടി. പരിസ്ഥിതി സ്നേഹം വളര്ത്തുന്നതിനും ചങ്ങാതിക്കൊരു തൈ പരിപാടിയിലൂടെയുള്ള വൃക്ഷത്തൈ കൈമാറ്റം ലക്ഷ്യമിടുന്നുണ്ട്. ചങ്ങാതിയുടെ പേരില് മണ്ണിലൊരു തൈ നട്ട് പരിപാലിക്കുന്നതിലൂടെ മണ്ണും മനുഷ്യനും തമ്മിലുള്ള ജൈവബന്ധവും സുഹൃത്തുക്കള് തമ്മിലുള്ള ആത്മബന്ധവും മഹാവൃക്ഷം പോലെ വളരട്ടെയെന്ന സന്ദേശംകൂടി കുട്ടികളിലെത്തും. അടുത്തമാസം 30 നകം ഒരുകോടി വൃക്ഷത്തൈകള് നട്ടുപിടിപ്പിക്കാന് ലക്ഷ്യമിട്ടുള്ള ഒരു തൈ നടാം ക്യാമ്പയിന് സംസ്ഥാനത്ത് പുരോഗമിക്കുകയാണ്. ഇതിനകം 25 ലക്ഷത്തിലധികം തൈകള് നട്ടുകഴിഞ്ഞു. തദ്ദേശ സ്വയംഭരണ സ്ഥാപനങ്ങള്, വിദ്യാഭ്യാസ സ്ഥാപനങ്ങള്, കുടുംബശ്രീ അംഗങ്ങള്, അയല്ക്കൂട്ടങ്ങള്, മഹാത്മാഗാന്ധി ദേശീയ-ഗ്രാമീണ തൊഴിലുറപ്പ് പദ്ധതി, അയ്യങ്കാളി തൊഴിലുറപ്പ് പദ്ധതി സോഷ്യല് ഫോറസ്ട്രി വിഭാഗം തുടങ്ങിയവയുടെ നേതൃത്വത്തില് വ്യാപകമായി വൃക്ഷത്തൈ ഉല്പാദനവും ഓഗസ്റ്റ്-സെപ്തംബര് മാസങ്ങളിലായി നടക്കുന്നുണ്ട്.