കെസിഎ പിങ്ക് ടൂര്‍ണ്ണമെന്റിന് തുടക്കം, പേള്‍സിനും എമറാള്‍ഡിനും വിജയം

തിരുവനന്തപുരം: കെസിഎ സംഘടിപ്പിക്കുന്ന പിങ്ക് ടി 20 ചലഞ്ചേഴ്‌സ് വനിതാ ക്രിക്കറ്റ് ടൂര്‍ണ്ണമെന്റിന് തുടക്കമായി. ആദ്യ ദിവസത്തെ മല്‌സരങ്ങളില്‍ കെസിഎ പേള്‍സും കെസിഎ എമറാള്‍ഡും ജയിച്ചു. ആദ്യ മല്‌സരത്തില്‍ പേള്‍സ് ഏഴ് വിക്കറ്റിന് റൂബിയെ തോല്പിച്ചപ്പോള്‍ രണ്ടാം മല്‌സത്തില്‍ എമറാള്‍ഡ് 77 റണ്‍സിന് ആംബറിനെ തോല്പിച്ചു. ക്യാപ്റ്റന്‍മാരുടെ ഓള്‍ റൌണ്ട് മികവാണ് ഇരു ടീമുകള്‍ക്കും വിജയമൊരുക്കിയത്.

പേള്‍സിനെതിരെ ആദ്യം ബാറ്റ് ചെയ്ത റൂബി 19.4 ഓവറില്‍ 87 റണ്‍സിന് ഓള്‍ ഔട്ടാവുകയായിരുന്നു. അഞ്ച് വിക്കറ്റ് വീഴ്ത്തിയ ക്യാപ്റ്റന്‍ ഷാനി തയ്യിലിന്റെ ഉജ്ജ്വല ബൌളിങ്ങാണ് പേള്‍സിന് കരുത്തായത്. ആര്യനന്ദ മൂന്നും കീര്‍ത്തി ജെയിംസ് രണ്ടും വിക്കറ്റുകള്‍ നേടി. ക്യാപ്റ്റന്‍ ദൃശ്യ വാസുദേവന്‍ അടക്കം മൂന്ന് പേര്‍ മാത്രമാണ് റൂബി ബാറ്റിങ് നിരയില്‍ രണ്ടക്കം കണ്ടത്. 22 റണ്‍സെടുത്ത ദൃശ്യയാണ് റൂബിയുടെ ടോപ് സ്‌കോറര്‍. അഷിമ ആന്റണി 17ഉം അജന്യ ടി പി പത്തും റണ്‍സെടുത്തു. മറുപടി ബാറ്റിങ്ങിന് ഇറങ്ങിയ പേള്‍സ് മൂന്ന് പന്തുകള്‍ ബാക്കി നില്‌ക്കെ മൂന്ന് വിക്കറ്റ് നഷ്ടത്തില്‍ ലക്ഷ്യത്തിലെത്തി. ബാറ്റിങ്ങിലും തിളങ്ങിയ ക്യാപ്റ്റന്‍ ഷാനി 19 റണ്‍സെടുത്തു. ആര്യനന്ദ 25 റണ്‍സുമായി പുറത്താകാതെ നിന്നപ്പോള്‍ ശ്രദ്ധ സുമേഷ് 23 റണ്‍സെടുത്തു. ഷാനിയാണ് കളിയിലെ താരം.

രണ്ടാം മല്‌സരത്തില്‍ ആംബറിനെതിരെ 77 റണ്‍സിന്റെ ഉജ്ജ്വല വിജയമാണ് എമറാള്‍ഡ് സ്വന്തമാക്കിയത്. ആദ്യം ബാറ്റ് ചെയ്ത എമറാള്‍ഡിന് ക്യാപ്റ്റന്‍ നജ്‌ല നൌഷാദിന്റെ ഉജ്ജ്വല ഇന്നിങ്‌സാണ് മികച്ച സ്‌കോര്‍ സമ്മാനിച്ചത്. 34 പന്തുകളില്‍ നാല് ഫോറും അഞ്ച് സിക്‌സുമടക്കം 58 റണ്‍സാണ് നജ്‌ല നേടിയത്. 45 റണ്‍സെടുത്ത വൈഷ്ണ എം പിയും മികച്ച പ്രകടനം കാഴ്ച വച്ചു. ഇരുവരുടെയും മികവില്‍ എമറാള്‍ഡ് 20 ഓവറില്‍ നാല് വിക്കറ്റ് നഷ്ടത്തില്‍ 155 റണ്‍സെടുത്തു. ആംബറിന് വേണ്ടി ക്യാപ്റ്റന്‍ സജന സജീവനും ശീതളും രണ്ട് വിക്കറ്റ് വീതം വീഴ്ത്തി. മറുപടി ബാറ്റിങ്ങിന് ഇറങ്ങിയ ആംബറിന് 20 ഓവറില്‍ ഏഴ് വിക്കറ്റ് നഷ്ടത്തില്‍ 78 റണ്‍സ് മാത്രമാണ് നേടാനായത്. 22 റണ്‍സെടുത്ത സൂര്യ സുകുമാര്‍ മാത്രമാണ് ആംബര്‍ നിരയില്‍ അല്പമെങ്കിലും ഭേദപ്പെട്ട പ്രകടനം കാഴ്ച വച്ചത്. സജന സജീവന്‍ 12ഉം അന്‍സു സുനില്‍ 13ഉം റണ്‍ശ് നേടി. എമറാള്‍ഡിന് വേണ്ടി നിയതി മഹേഷ് മൂന്നും നജ്‌ല നൌഷാദ് രണ്ടും വിക്കറ്റുകള്‍ വീഴ്ത്തി. നജ്‌ലയാണ് പ്ലെയര്‍ ഓഫ് ദി മാച്ച്.

തിരുവനന്തപുരം തുമ്പ സെന്റ് സേവിയേഴ്‌സ് കോളേജ് ഗ്രൌണ്ടിലാണ് ടൂര്‍ണ്ണമെന്റിലെ എല്ലാ മല്‌സരങ്ങളും നടക്കുന്നത്. ആകെ അഞ്ച് ടീമുകളാണ് ടൂര്‍ണ്ണമെന്റില്‍ പങ്കെടുക്കുന്നത്.