മലപ്പുറം: പോക്സോ കേസില് ശിക്ഷ ഉറപ്പായതോടെ ആത്മഹത്യാ നാടകം കളിച്ച പ്രതി പിടിയില്. പള്ളാട്ടില് മുഹമ്മദ് നാഫിയാണ് കാളികാവ് പൊലീസ് ആലപ്പുഴയില് നിന്ന് പിടികൂടിയത്. രണ്ടുമാസം മുന്നെ നാഫിയെ കാണാതായെന്ന പരാതി മാതാവ് പൊലീസില് നല്കിയിരുന്നു. മലപ്പുറം മാളിയേക്കലില് നിന്നുമാണ് നാഫിയെ കാണാതായത്. പൊലീസ് കേസ് രജിസ്റ്റര് ചെയ്ത് അന്വേഷണം നടത്തിവരുന്നതിനിടെ ബേപ്പൂര് കടപ്പുറത്തു നിന്നും ആത്മഹത്യാ കുറിപ്പ് അടങ്ങിയ നാഫിയുടെ ബാഗ് കണ്ടെടുക്കുകയും ചെയ്തു. കടലില് ചാടി ആത്മഹത്യ നടത്തിയെന്ന് വരുത്തിത്തീര്ക്കാനായിരുന്നു പ്രതിയുടെ ലക്ഷ്യം.
കാളികാവ് പോലീസ്, ബേപ്പൂര് സ്റ്റേഷന് പരിധിയിലെ കരയിലും സമീപ പ്രദേശങ്ങളിലെ തീരദേശ പൊലീസ് സ്റ്റേഷനുകളിലും അന്വേഷണം നടത്തി. കടലില് കാണപ്പെട്ട എട്ടോളം അഞ്ജാത മൃതദേഹങ്ങള് പരിശോധിക്കുകയും അന്വേഷണം നടത്തുകയും ചെയ്തിരുന്നുവെങ്കിലും കാണാതായ മുഹമ്മദ് നാഫിയെക്കുറിച്ച് യാതൊരു തുമ്പും കിട്ടിയിരുന്നില്ല.
ഇയാള് പ്രതിയായ പോക്സോ കേസിന്റെ വിചാരണ പെരിന്തല്മണ്ണ പോക്സോ കോടതിയില് അന്തിമഘട്ടത്തിലായിരുന്നു. ഈ കേസില് ശിക്ഷ ഉറപ്പായ നാഫി ശിക്ഷയില് നിന്നും രക്ഷപ്പെടുന്നതിനായാണ് ആത്മഹത്യാ നാടകം ഒരുക്കിയത്. ഒടുവില് ഇയാള് ആലപ്പുഴയില് ഉണ്ടെന്ന് കണ്ടെത്തി. ഒളിവില് പോയതിന് ശേഷം വീട്ടുകാരുമായോ, സുഹൃത്തുകളുമായോ ഒരിക്കല് പോലും ഫോണില് ബന്ധപ്പെട്ടിരുന്നില്ല. മറ്റൊരാളുടെ അഡ്രസ്സില് എടുത്ത ഫോണ് നമ്പറാണ് ഉപയോഗിച്ചിരുന്നത്. കാളികാവ് പോലീസ് ഇന്സ്പെക്ടര് വി അനീഷിന്റെ നേതൃത്വത്തിലുള്ള സംഘമാണ് കേസ് അന്വേഷണം നടത്തിയത്. പ്രതിയെ പെരിന്തല്മണ്ണ കോടതിയില് ഹാജരാക്കി റിമാന്ഡ് ചെയ്തു.