കാഞ്ഞങ്ങാട്: മദ്രസകള് അടച്ചുപൂട്ടണമെന്ന ദേശീയ ബാലാവകാശ കമ്മീഷന്റെ വികലമായ നിര്ദേശം സംഘ്പരിവാറിന്റെ പ്രീതിക്ക് വേണ്ടിയാണന്നും
സംഘപരിവാറിന്റെ വര്ഗീയ അജണ്ട ബാലാവകാശ കമ്മീഷന്റെ മറവില് നടപ്പിലാക്കാനുള്ള ശ്രമമാണെന്നും കാഞ്ഞങ്ങാട് മുസ്ലിം യതീംഖാന കമ്മിറ്റി യോഗം അഭിപ്രായപ്പെട്ടു. ഈ നീക്കത്തെ എതിര്ക്കാന് പൊതുസമൂഹം തയ്യാറാവണമെന്നും കാഞ്ഞങ്ങാട് മുസ്ലിം യതീംഖാന കമ്മിറ്റി പ്രസ്താവനയില് പറഞ്ഞു.
സംഘപരിവാര് ശക്തികള് തുടര്ന്നുവരുന്ന മുസ്ലിം വിരുദ്ധ അജണ്ടകളുടെ ഭാഗമാണ് മദ്രസകള് അടച്ചുപൂട്ടണമെന്ന ദേശീയ ബാലാവകാശ കമ്മീഷന്റെ വികലമായ നിര്ദേശം. കുഞ്ഞു മനസ്സുകള്ക്ക് മതബോധത്തിന്റെയും ധാര്മികതയുടെയും ഉന്നത സംസ്കാരത്തിന്റെയും ശിക്ഷണം നല്കുന്ന പാഠശാലകളാണ് മദ്രസകള്. അവ അടച്ചുപൂട്ടണം എന്ന നിര്ദ്ദേശം സാമാന്യ ബുദ്ധിക്ക് നിരക്കാത്തതും ഭരണഘടന പൗരന് നല്കുന്ന അവകാശങ്ങളുടെ ലംഘനവുമാണ്.
മത ന്യൂനപക്ശങ്ങള്ക്ക് ഭരണഘടന നല്കുന്ന അവകാശത്തിന്മേലുള്ള ഇത്തരം കടന്നു കയറ്റത്തെ എതിര്ക്കാന് പൊതുസമൂഹം തയ്യാറാവണം.
യോഗത്തില് പ്രസിഡന്റ് ബെസ്റ്റോ കുഞ്ഞാമദ് അധ്യക്ഷത വഹിച്ചു. എം പി ജാഫര്, ബി എം മുഹമ്മദ് കുഞ്ഞി, ആസിഫ് മെട്രോ, ഹമീദ് ചേരക്കാടത്ത്, പി എം നാസ്സര്, എം പി നൗഷാദ് പ്രസംഗിച്ചു. ജനറല് സെക്രട്ടറി സുപ്രിം മുഹമ്മദ് കുഞ്ഞി സ്വാഗതവും, ട്രഷറര് സി കെ റഹ്മത്തുള്ള നന്ദിയും പറഞ്ഞു.