ദേശീയ ജന്തുരോഗ നിയന്ത്രണ പദ്ധതിയുടെ ഭാഗമായി കന്നുകാലികളിലെ കുളമ്പുരോഗ പ്രതിരോധ കുത്തിവയ്പ് പദ്ധതിയുടെ ഏഴാം ഘട്ടത്തിനും ചര്മ്മ മുഴ രോഗ പ്രതിരോധ കുത്തിവയ്പ് പദ്ധതിയുടെ മൂന്നാം ഘട്ടത്തിന (ഡിസംബര് 17) തുടക്കമായി. വൈകിട്ട് 3 മണിക്ക് വയനാട് പൂക്കോട് വെറ്ററിനറി കോളേജ് ഓഡിറ്റോറിയത്തില് മൃഗസംരക്ഷണ വകുപ്പ് ഡയറക്ടര് ഡോ.റെജില് എം സി യുടെ അധ്യക്ഷതയില് കൂടുന്ന ചടങ്ങില് മൃഗസംരക്ഷണ-ക്ഷീരവികസന വകുപ്പ് മന്ത്രി ജെ.ചിഞ്ചുറാണി പ്രതിരോധ കുത്തിവെയ്പ്പിന്റെ സംസ്ഥാനതല ഉദ്ഘാടനം നിര്വഹിച്ചു.
ജനുവരി 23 വരെ 30 പ്രവൃത്തി ദിവസം കൊണ്ട് ഈ യജ്ഞം പൂര്ത്തീകരിയ്ക്കാനാണ് വകുപ്പ് ലക്ഷ്യമിടുന്നത്. 4 മാസത്തിനു മുകളില് പ്രായമുള്ള പശു, എരുമ വര്ഗ്ഗത്തില്പ്പെട്ട മുഴുവന് ഉരുക്കളെയും കുളമ്പുരോഗ കുത്തിവയ്പിന് വിധേയമാക്കും. ചര്മ്മ മുഴരോഗ പ്രതിരോധ കുത്തിവെയ്പ്പ് 4 മാസത്തിനു മുകളില് പ്രായമുള്ള പശു വര്ഗ്ഗത്തില്പ്പെട്ട ഉരുക്കള്ക്കു മാത്രമാണ് നല്കുന്നത്. മൃഗസംരക്ഷണ വകുപ്പില് നിന്നും നിയോഗിച്ചിട്ടുള്ള ഉദ്യോഗസ്ഥരുടെ ടീമുകള് കര്ഷകരുടെ വീട്ടുപടിക്കല് എത്തി തികച്ചും സൗജന്യമായാണ് ഉരുക്കള്ക്കു പ്രതിരോധ കുത്തിവെപ്പുകള് നല്കുന്നത്. ഇതിനായി സംസ്ഥാനമൊട്ടാകെ 1916 സ്ക്വാഡുകള് രൂപീകരിച്ചിട്ടുണ്ട്.
കന്നുകാലികളുടെ ആരോഗ്യത്തെയും, ഉല്പ്പാദനക്ഷമതയെയും സാരമായി ബാധിക്കുന്ന സാംക്രമിക വൈറല് രോഗങ്ങളാണ് കുളമ്പുരോഗവും (FMD) ചര്മ്മമുഴരോഗവും (LSD). ശാസ്ത്രീയ നിയന്ത്രണ മാര്ഗങ്ങള് പാലിച്ചുകൊണ്ട് സമയബന്ധിതമായ പ്രതിരോധ കുത്തിവെയ്പ്പുകളിലൂടെ മാത്രമേ ഈ രോഗങ്ങള് തടയുവാന് കഴിയുകയുള്ളു. ഇത്തരം പ്രതിരോധ കുത്തിവയ്പ്പുകള് കന്നുകാലികളിലെ രോഗത്തെ തടഞ്ഞു അവയുടെ ഉല്പാദനശേഷി നിലനിര്ത്തുന്നതോടൊപ്പം രോഗബാധയോടനുബന്ധിച്ച് ഉണ്ടാകുന്ന മറ്റ് ലക്ഷണങ്ങള്ക്കുള്ള ചികിത്സയായി നല്കുന്ന ആന്റിബയോട്ടിക്കുകളുടെ ഉപയോഗവും കുറയ്ക്കുന്നു. അതുവഴി Antimicrobial resistance (AMR) ഉണ്ടാകുന്നത് തടയുകയും, ഭക്ഷ്യ സുരക്ഷ (പാല്, മാംസം, അവയുടെ ഉല്പ്പന്നങ്ങള്) ഉറപ്പാക്കുകയും ചെയ്യുന്നു.
കുളമ്പുരോഗ പ്രതിരോധ കുത്തിവെയ്പ്പ്:
4 മാസത്തിനു മുകളില് പ്രായമുള്ള പശു, എരുമ വര്ഗ്ഗത്തില്പ്പെട്ട മുഴുവന് ഉരുക്കളെയും കുളമ്പുരോഗ കുത്തിവയ്പിന് വിധേയമാക്കും.
4 മാസത്തില് താഴെയുള്ള പശു/കാളക്കുട്ടികള്, ഗര്ഭാവസ്ഥയുടെ അവസാന മൂന്ന് മാസങ്ങളിലുള്ള മൃഗങ്ങള്, രോഗബാധിതരായ മൃഗങ്ങള്, എന്നിവയ്ക്ക് വാക്സിനേഷന് നല്കുന്നതല്ല.
റിംഗ് വാക്സിനേഷന്റെ ഭാഗമായി മൂന്ന് മാസത്തിനകം കുളമ്പുരോഗ പ്രതിരോധ വാക്സിനേഷന് നല്കിയിട്ടുള്ള കന്നുകാലികള്ക്ക് ഈ ക്യാമ്പെയ്ന് വേളയില് പ്രതിരോധ കുത്തിവയ്പ്പ് നല്കുന്നതല്ല.
ചര്മ്മമുഴരോഗ പ്രതിരോധ കുത്തിവെയ്പ്പ്:
4 മാസമോ അതില് കൂടുതലോ പ്രായമുള്ള ആരോഗ്യമുള്ള കന്നുകാലികള്ക്ക് ചര്മ്മമുഴരോഗ പ്രതിരോധ കുത്തിവയ്പ്പ് നല്കുന്നതാണ്.
എരുമകളെ ചര്മ്മമുഴരോഗ പ്രതിരോധ വാക്സിനേഷനില് നിന്നും ഒഴിവാക്കിയിട്ടുണ്ട്.
ഗര്ഭിണികളായ മൃഗങ്ങള്ക്ക് ഗര്ഭാവസ്ഥയുടെ ഏത് ഘട്ടത്തിലും സുരക്ഷിതമായി പ്രതിരോധ കുത്തിവയ്പ്പ് നല്കാം.
രോഗബാധിതരായ മൃഗങ്ങള്, 4 മാസത്തില് താഴെയുള്ള മൃഗങ്ങള്, കഴിഞ്ഞ മൂന്ന് മാസത്തിനുള്ളില് വാക്സിന് സ്വീകരിച്ച മൃഗങ്ങള് എന്നിവയ്ക്ക് ഈ ക്യാമ്പയിന് വേളയില് പ്രതിരോധ കുത്തിവയ്പ്പ് നല്കുന്നതല്ല.