തിരുവനന്തപുരം: മോട്ടോര് വാഹനവകുപ്പ് റോഡ് നികുതിവെട്ടിപ്പ് തടയാന് എഐ ക്യാമറ സംവിധാനത്തെ സജ്ജമാക്കുന്നു. ജിഎസ്ടി വകുപ്പിന്റെ സഹകരണത്തോടെയാണിത് നടപ്പാക്കുക. ഇതിനായി സംസ്ഥാനത്തേക്ക് വരുന്നതും പോകുന്നതുമായ വാഹനങ്ങളുടെ വിവരങ്ങള് ചെക്പോസ്റ്റുകളില് ജിഎസ്ടി വിഭാഗം സ്ഥാപിച്ച ഓട്ടോമേറ്റഡ് നമ്പര്പ്ലേറ്റ് റെക്കഗനേഷന് ക്യാമറകള് ശേഖരിച്ച് ‘വാഹന്’ സോഫ്റ്റ്വെയറിലേക്ക് കൈമാറും. ചിത്രത്തില് നിന്ന് വാഹനത്തിന്റെ നമ്പര് തിരിച്ചറിയാന് കഴിയുന്ന സംവിധാനമാണിത്. ഇതിനുള്ള സോഫ്റ്റ്വെയര് സംയോജനം പൂര്ത്തിയായി. ഒരുമാസത്തിനുള്ളില് ഇത് പ്രവര്ത്തനക്ഷമമാകും.
സംസ്ഥാനത്തേക്ക് കടന്ന് നിശ്ചിതസമയത്തിനുള്ളില് തിരികെപ്പോകാത്ത വാഹനങ്ങളുടെ വിവരങ്ങളും സംവിധാനത്തിലൂടെ മോട്ടോര് വാഹനവകുപ്പിന് ലഭിക്കും. നികുതി വെട്ടിക്കാന് ഇതര സംസ്ഥാനങ്ങളില് രജിസ്റ്റര് ചെയ്യുന്ന ആഡംബരവാഹനങ്ങളെയും ഇതിലൂടെ കണ്ടെത്താന് കഴിയും. 12 മാസത്തിലധികമായി വാഹനം സംസ്ഥാനത്ത് ഉപയോഗിക്കുകയാണെങ്കില് നികുതിയടച്ച് പുതിയ രജിസ്ട്രേഷന് നേടണമെന്നാണ് കേന്ദ്ര മോട്ടോര്വാഹനചട്ടം. ഈ വാഹനങ്ങള് സംസ്ഥാനത്തേക്ക് കടന്ന തീയതി സംബന്ധിച്ച് തെളിവില്ലാത്തതിനാല് നേരത്തേ കേസെടുക്കാന് കഴിഞ്ഞിരുന്നില്ല.
അതേസമയം, പത്ത് വര്ഷത്തിലധികം പഴക്കമുള്ള ഡീസല് വാഹനങ്ങള്ക്ക് ഡല്ഹിയില് നിയന്ത്രണങ്ങള് ഏര്പ്പെടുത്തിയതോടെ ഇവിടെ നിന്ന് സംസ്ഥാനത്തേക്ക് വന്തോതില് വാഹനങ്ങള് എത്തുന്നുണ്ട്. ഇവ നികുതിയടയ്ക്കാതെ ഉപയോഗിക്കുന്നതായി കണ്ടെത്തിയതിനെ തുടര്ന്ന് അധികൃതര് വ്യവസ്ഥകള് കൂടുതല് കര്ശനമാക്കി. സംസ്ഥാനത്ത് രജിസ്റ്റര് ചെയ്യാന് നോഒബ്ജക്ഷന് സര്ട്ടിഫിക്കറ്റ് നേടി 14 ദിവസം കഴിഞ്ഞാല് റോഡ് നികുതി അടയ്ക്കേണ്ടിവരും.