നീലേശ്വരത്തെ റെയില്വേ വികസനവുമായി ബന്ധപ്പെട്ട് നഗരസഭ ചെയര്പേഴ്സണ് ടി.വി ശാന്തയുടെ നേതൃത്വത്തിലുള്ള സര്വകക്ഷി സംഘം കേന്ദ്ര സഹമന്ത്രി വി മുരളീധരന് ഡല്ഹിയിലെ ഓഫീസിലെത്തി നിവേദനം സമര്പ്പിച്ചു. മംഗലാപുരം – ചെന്നൈ മെയില് എക്സ് പ്രസ് (നം . 12601 – 12602) , തിരുവനന്തപുരം – കുര്ള ലോകമാന്യതിലക് നേത്രാവതി എക്സ്പ്രസ് ( നം. 16345, 16346) ട്രെയിനുകള്ക്ക് നീലേശ്വരത്ത് സ്റ്റോപ്പ് അനുവദിക്കുക, പ്രത്യേകം റിസര്വേഷന് കൗണ്ടര് അനുവദിക്കുക, നീലേശ്വരം റെയില്വേ സ്റ്റേഷനോട് ചേര്ന്നുള്ള 24 ഏക്കര് റെയില്വേ ഭൂമി റെയില്വേ വികസനത്തിന് പ്രയോജനപ്പെടുത്തുക എന്നീ ആവശ്യങ്ങളാണ് നിവേദനത്തിലുള്ളത്.
ചെയര്പേഴ്സന് പുറമേ വൈസ് ചെയര്മാന് പി.പി മുഹമ്മദ് റാഫി , പൊതുമരാമത്ത് സ്ഥിരം സമിതി അധ്യക്ഷന് കെ. പി രവീന്ദ്രന് , സിപിഐഎം ഏരിയ സെക്രട്ടറി എം. രാജന് ബിജെപി നേതാവ് പി. യു വിജയകുമാര് എന്നിവര് നിവേദക സംഘത്തിലുണ്ടായിരുന്നു.
എംപിമാരായ ജോണ് ബ്രിട്ടാസ് , വി ശിവദാസന് , എ. എ റഹീം, മുന് എം.പി പി. കരുണാകരന് എന്നിവരുമൊത്ത് സര്വകക്ഷി സംഘം കഴിഞ്ഞദിവസം കേന്ദ്ര മന്ത്രി നിതിന് ഗഡ്കരിയെ കാണുകയും നീലേശ്വരത്തെ ദേശീയപാത വികസനവുമായി ബന്ധപ്പെട്ട പ്രശ്നങ്ങള് ശ്രദ്ധയില്പ്പെടുത്തുകയും ചെയ്തിരുന്നു.