കൊച്ചി: തൃപ്പൂണിത്തുറ പൂര്ണത്രയീശ ക്ഷേത്രത്തിലെ ആന എഴുന്നള്ളിപ്പില് കേസ് എടുത്ത് വനം വകുപ്പ്. ആനകളുടെ എഴുന്നള്ളിപ്പുമായി ബന്ധപ്പെട്ട് ഹൈക്കോടതി പുറത്തിറക്കിയ മാനദണ്ഡങ്ങല് പാലിച്ചില്ലെന്ന കണ്ടെത്തലിനെ തുടര്ന്നാണ് ക്ഷേത്ര ഭരണസമിതിക്കെതിരെ വനംവകുപ്പ് കേസെടുത്തിരിക്കുന്നത്. വനം വകുപ്പിന്റെ സോഷ്യല് ഫോറസ്ട്രി വിഭാഗമാണ് കേസെടുത്തത്.
ക്ഷേത്രോത്സവത്തിനിടെ നടത്തിയ എഴുന്നള്ളിപ്പില് ആനകള് തമ്മിലുളള അകലം മൂന്നു മീറ്റര് ഉണ്ടായിരുന്നില്ലെന്നും ആളുകളും ആനയുമായുളള എട്ടു മീറ്റര് അകലവും പാലിച്ചില്ലെന്നും വനംവകുപ്പ് പരിശോധനയില് കണ്ടെത്തി. ആനകളുടെ സമീപത്തുകൂടി തീവെട്ടിയുമായി പോയെന്നും ഇക്കാര്യത്തിലും 5 മീറ്റര് അകലം പാലിച്ചില്ലെന്നും വനംവകുപ്പ് അറിയിച്ചു.