പള്ളിക്കര: കാഞ്ഞങ്ങാട് ബ്ലോക്ക് പഞ്ചായത്തിന്റെ 2024- 25 വാര്ഷിക പദ്ധതിയില് ഉള്പ്പെടുത്തി ‘ആഗ്രോ കാര്ണിവല്- 2024’ എന്ന കാര്ഷിക ഉത്പന്ന ഉപകരണ പ്രദര്ശന വിപണന മേള ഡിസംബര് 22 മുതല് 31 വരെ ബേക്കല് പള്ളിക്കരയില് വച്ച് സംഘടിപ്പിക്കുകയാണ്. പരമ്പരാഗത ഉല്പ്പന്നങ്ങള്, ജൈവവൈവിധ്യ ശേഖരങ്ങള്, അത്യപൂര്വ്വമായ കാഴ്ച വസ്തുക്കള്, അത്യുല്പാദനശേഷിയുള്ള വിത്തുകള്, തൈകള്, നൂതന സാങ്കേതിക വിദ്യയെ അടിസ്ഥാനമാക്കിയുള്ള ഉപകരണങ്ങള്, ഉല്പ്പന്നങ്ങള് എന്നിവയുടെ പ്രദര്ശനവും വിപണനവുമാണ് കാര്ണിവലിന്റെ പ്രധാന ആകര്ഷണമായി ഉള്പ്പെടുത്തിയിട്ടുള്ളത്. വലിയ ജനകീയ പങ്കാളിത്തത്തോടെ നടപ്പിലാക്കുന്ന കാര്ണിവലില് സാംസ്കാരിക പരിപാടികള്, സെമിനാറുകള്, വിവിധതരം കലാപരിപാടികള്, ഫ്ലവര് ഷോ, കുട്ടികള്ക്കുള്ള പാര്ക്ക് എന്നിവയും ഒരുക്കും. ക്രിസ്തുമസ് അവധി നാളുകളില് 10 ദിവസങ്ങളിലായി നടത്തുന്ന കാര്ണിവലിലേക്ക് ലക്ഷത്തിലധികം കാണികളെയാണ് പ്രതീക്ഷിക്കുന്നത്. ആഗ്രോ കാര്ണിവല് 2024 ന്റെ സംഘാടകസമിതി യോഗം പള്ളിക്കര സര്വീസ് സഹകരണ ബാങ്ക് ഹാളില് വച്ച് നടന്നു. കാഞ്ഞങ്ങാട് ബ്ലോക്ക് പഞ്ചായത്ത് പ്രസിഡണ്ട് കെ. മണികണ്ഠന് ഉദ്ഘാടനം നിര്വഹിച്ചു. പള്ളിക്കര ഗ്രാമപഞ്ചായത്ത് പ്രസിഡണ്ട് എം. കുമാരന് അധ്യക്ഷത വഹിച്ചു. പള്ളിക്കര പഞ്ചായത്ത് വൈസ് പ്രസിഡണ്ട് നാസ്നിന് വഹാബ്, ബ്ലോക്ക് പഞ്ചായത്ത് മെമ്പര്മാരായ എം. കെ. വിജയന്,കെ.സീത, എ. ദാമോദരന്, ഉദുമ പഞ്ചായത്ത് പ്രസിഡണ്ട് പി. ലക്ഷ്മി, കൃഷി അസിസ്റ്റന്റ് ഡയറക്ടര് ബിന്ദു.കെ, പൊതുപ്രവര്ത്തകരായ കെ. ഇ.എ ബക്കര്, എം. എ. ലത്തീഫ്, ഗംഗാധരന് പൊടിപള്ളം, രാജേഷ് പള്ളിക്കര എന്നിവര് സംസാരിച്ചു. കാഞ്ഞങ്ങാട് ബ്ലോക്ക് പഞ്ചായത്ത് വികസനകാര്യ സ്റ്റാന്ഡിങ് കമ്മിറ്റി ചെയര്മാന് എം അബ്ദുള് റഹ്മാന് സ്വാഗതവും കൃഷി ഓഫീസര് പി.വി.ജലേശന് നന്ദിയും പറഞ്ഞു.