വയനാട്: മേപ്പാടി മുണ്ടക്കൈയിലുണ്ടായ ഉരുള്പൊട്ടലില് മരണം 63 ആയി. 70 പേര്ക്ക് പരിക്ക്. നിലമ്ബൂര് പോത്തുക്കല്ല് ഭാഗത്ത് പുഴയില് പലയിടങ്ങളില് നിന്നായി ലഭിച്ച നിരവധി പേരുടെ മൃതദേഹങ്ങള് ഉള്പ്പെടെയുള്ള കണക്കാണിത്.മരണസംഖ്യ ഇനിയും ഉയരാന് സാദ്ധ്യതയുണ്ടെന്നാണ് വിവരം. 10 പേരുടെ മൃതദേഹങ്ങള് തിരിച്ചറിഞ്ഞു. റംലത്ത് (53), അഷ്റഫ് (49), കുഞ്ഞിമെയ്തീന് (65), ലെനിന്, വിജീഷ് (37), സുമേഷ് (35), സലാം (39), ശ്രേയ (19), പ്രേമലീല, റെജിന എന്നിവരുടെ മൃതദേഹമാണ് തിരിച്ചറിഞ്ഞത്. രക്ഷാപ്രവര്ത്തനത്തിന് ഏഴിമലയില് നിന്ന് നാവിക സേന സംഘം എത്തും.രക്ഷാപ്രവര്ത്തനത്തിനായി സൈന്യത്തിന്റെ എന്ജിനിയറിംഗ് ഗ്രൂപ്പ് വയനാട്ടിലേക്കെത്തും. ഉരുള്പൊട്ടലില് പാലം തകര്ന്ന സാഹചര്യത്തില് ബദല് സംവിധാനം അടക്കമുള്ള കാര്യങ്ങള് സൈന്യത്തിന്റെ എന്ജിനിയറിംഗ് വിഭാഗം നടപ്പാക്കും. അതിനിടെ രക്ഷാപ്രവര്ത്തനത്തിന് എയര് ലിഫ്റ്റിംഗ് സാദ്ധ്യത പരിശോധിക്കാനെത്തിയ രണ്ട് ഹെലികോപ്റ്റുകള് വയനാട്ടില് ഇറങ്ങാനാകാതെ തിരിച്ചുപോയി. പുലര്ച്ചെ രണ്ട് മണിയോടെയാണ് മുണ്ടക്കൈയില് ഉരുള്പ്പൊട്ടിയത്. കരസേനയുടെ 190 അംഗ സംഘം വയനാട്ടിലേക്ക് പുറപ്പെട്ടിട്ടുണ്ട്. ടെറിട്ടോറിയല് ആര്മി കോഴിക്കോട് 122 ബറ്റാലിയനില് നിന്നും ഒരു കമ്ബനി ഉടന് യാത്ര തിരിക്കും. 50പേരടങ്ങുന്ന സംഘമാണ് പുറപ്പെടുന്നത്.