കോഴിക്കോട്: സര്‍ക്കാരിന്റെ അനുമതിയില്ലാതെ സംസ്ഥാനത്ത് എക്‌സൈസ് ഉദ്യോഗസ്ഥര്‍ ബാറുകള്‍ക്ക് ലൈസന്‍സ് നല്‍കിയ സംഭവത്തില്‍ കടുത്ത വിമര്‍ശനവുമായി സമസ്ത കാന്തപുരം വിഭാഗത്തിന്റെ മുഖപത്രമായ ‘സിറാജ്’. സര്‍ക്കാരിന്റെ നയം കാറ്റില്‍ പറത്തിയുള്ള ഉദ്യോഗസ്ഥരുടെ ഇത്തരം നടപടികള്‍ അധികാരലംഘനമാണെന്നും മുന്‍ സര്‍ക്കാരിന്റെ ചട്ടങ്ങളിലെ പിഴവുകള്‍ മുതലെടുത്താണ് ഇത് നടന്നതെന്നും ദിനപത്രത്തില്‍ ചൂണ്ടിക്കാട്ടുന്നു. സംസ്ഥാനത്ത് നടക്കുന്നത് ‘ഉദ്യോഗസ്ഥ ഭരണമാണോ’ എന്നും മുഖപത്രം ചോദിക്കുന്നു.
സര്‍ക്കാര്‍ അറിയാതെ പുതിയ ബാറുകള്‍ അനുവദിക്കാന്‍ പാടില്ലെന്ന് വ്യക്തമാക്കിയ മുഖ്യമന്ത്രി, പുതിയ മദ്യനയം ഉടന്‍ വരുമെന്ന് അറിയിക്കുകയും ഉദ്യോഗസ്ഥ നടപടിയെ വിമര്‍ശിക്കുകയും ചെയ്തിരുന്നു. യു.ഡി.എഫ്. ഭരണകാലത്തെ മദ്യനയം മാറുന്നത് വരെ ലൈസന്‍സ് അനുവദിക്കരുതെന്ന നിര്‍ദേശം മറികടന്ന ഉദ്യോഗസ്ഥര്‍ക്കെതിരെ കര്‍ശന നടപടിയുണ്ടാകുമെന്ന് മന്ത്രി എം. ലിജു മുന്നറിയിപ്പ് നല്‍കി.
എറണാകുളത്ത് രണ്ടും കോട്ടയത്ത് ഒന്നും ബിയര്‍ പാര്‍ലറുകള്‍ക്ക് വിദേശമദ്യ ലൈസന്‍സ് നല്‍കിയ എക്‌സൈസ് നടപടിയില്‍ മന്ത്രി തലത്തില്‍ അതൃപ്തി നിലനില്‍ക്കെയാണ്, നെടുമ്പാശ്ശേരി വിമാനത്താവളത്തിലെ ഡൊമസ്റ്റിക് ലോഞ്ചില്‍ പുതിയ രണ്ട് ബാറുകള്‍ക്ക് കൂടി ലൈസന്‍സ് നല്‍കിയത്. ട്രാവല്‍ ഫുഡ് സര്‍വീസസ് ലിമിറ്റഡിന്റെ അപേക്ഷയില്‍ എക്‌സൈസ് കമ്മീഷണര്‍ സാംബശിവ റാവുവാണ് ജൂണ്‍ 22-ന് എഘ7 ലൈസന്‍സുകള്‍ അനുവദിച്ചത്. തുടര്‍ന്ന് ബാലാജി കാറ്റേഴ്‌സ് നല്‍കിയ അപേക്ഷ സര്‍ക്കാര്‍ തലത്തിലേക്ക് എത്തിയെങ്കിലും പുതിയ മദ്യനയം വരുന്നത് വരെ നടപടി പാടില്ലെന്ന് സര്‍ക്കാര്‍ നിര്‍ദേശിക്കുകയായിരുന്നു.
അതേസമയം, മുഖ്യമന്ത്രി ചെയര്‍മാനായ ‘സിയാല്‍’ നല്‍കിയ അപേക്ഷയുടെ അടിസ്ഥാനത്തിലാണ് ലൈസന്‍സ് അനുവദിച്ചതെന്നും ഇത് പൊതുജനങ്ങള്‍ക്കുള്ളതല്ലെന്നും വ്യക്തമാക്കി എക്‌സൈസ് കമ്മീഷണര്‍ നടപടിയെ ന്യായീകരിച്ചു. എന്നാല്‍, എക്‌സൈസ് മന്ത്രിയുടെ വാദങ്ങളെ പ്രതിപക്ഷം രൂക്ഷമായി വിമര്‍ശിച്ചു. നയം വരുന്നത് വരെ കാത്തിരിക്കാന്‍ മന്ത്രി ആവശ്യപ്പെട്ടിട്ടും ഉദ്യോഗസ്ഥര്‍ തന്നിഷ്ടപ്രകാരം ലൈസന്‍സ് നല്‍കുന്നത് സര്‍ക്കാരിനെയും വകുപ്പിനെയും വീണ്ടും പ്രതിസന്ധിയിലാക്കുകയാണ്.