കര്‍ണാടക സംഗീത ത്രിമൂര്‍ത്തികളില്‍ ഒരാളായ മുത്തുസ്വാമി ദീക്ഷിതരുടെ 250-ാം ജന്മവാര്‍ഷികത്തോടനുബന്ധിച്ച് 250 രൂപയുടെ പ്രത്യേക സ്മാരക നാണയം പുറത്തിറക്കി. വാരണാസി ഐ.ഐ.ടി- ബനാറസ് ഹിന്ദു സര്‍വകലാശാലയില്‍ സംഘടിപ്പിച്ച ചടങ്ങില്‍ കേന്ദ്ര ധനമന്ത്രി നിര്‍മല സീതാരാമനാണ് നാണയ പ്രകാശനം നിര്‍വ്വഹിച്ചത്. റിസര്‍വ് ബാങ്ക് ഓഫ് ഇന്ത്യയുടെ മേല്‍നോട്ടത്തില്‍ ഗവണ്‍മെന്റ് മിന്റാണ് നാണയം പുറത്തിറക്കിയത്.
ശേഖരണത്തിനായി നിര്‍മ്മിച്ചിരിക്കുന്ന ഈ സ്മാരക നാണയങ്ങള്‍ പൊതു വിപണിയിലെ സാമ്പത്തിക ഇടപാടുകള്‍ക്ക് ഉപയോഗിക്കാനാകില്ല. ആവശ്യക്കാര്‍ക്ക് ഗവണ്‍മെന്റ് മിന്റിന്റെ ഔദ്യോഗിക വെബ്സൈറ്റ് വഴി 6,985 രൂപ നിരക്കില്‍ നാണയം വാങ്ങാം. ഇന്ത്യന്‍ ശാസ്ത്രീയ സംഗീതത്തിനും സാംസ്‌കാരിക പാരമ്പര്യത്തിനും മുത്തുസ്വാമി ദീക്ഷിതര്‍ നല്‍കിയ അളവറ്റ സംഭാവനകളെ ധനമന്ത്രി ചടങ്ങില്‍ അനുസ്മരിച്ചു. ത്യാഗരാജ സ്വാമികള്‍ക്കും ശ്യാമ ശാസ്ത്രികള്‍ക്കുമൊപ്പം കര്‍ണാടക സംഗീതത്തിലെ പ്രധാന ആചാര്യനാണ് മുത്തുസ്വാമി ദീക്ഷിതര്‍. സംസ്‌കൃതത്തില്‍ രചിക്കപ്പെട്ട അദ്ദേഹത്തിന്റെ 450-ലേറെ കൃതികള്‍ ഭക്തിയും തത്ത്വചിന്തയും സമന്വയിക്കുന്നവയാണ്. ഏറെക്കാലം വാരണാസിയില്‍ വസിച്ച അദ്ദേഹം അവിടുത്തെ ക്ഷേത്രങ്ങളെയും ദേവീദേവന്മാരെയും പ്രകീര്‍ത്തിച്ച് നിരവധി കീര്‍ത്തനങ്ങള്‍ രചിച്ചിട്ടുണ്ട്.