ശ്രീകാര്യം: തിരുവനന്തപുരം പാങ്ങപ്പാറയില്‍ പ്ലസ് വണ്‍ വിദ്യാര്‍ഥിയായ അഭിരാം (17) കൊല്ലപ്പെട്ട സംഭവം ആഴ്ചകള്‍ നീണ്ട ആസൂത്രണത്തിനൊടുവിലാണെന്ന് പോലീസ് സ്ഥിരീകരിച്ചു. പെണ്‍കുട്ടിയുമായുള്ള അടുപ്പത്തെച്ചൊല്ലിയുള്ള തര്‍ക്കത്തെ തുടര്‍ന്ന് പതിനേഴുകാരനായ സുഹൃത്തും കൂട്ടാളിയും ചേര്‍ന്ന് അഭിരാമിനെ ആസൂത്രിതമായി കെണിയില്‍പ്പെടുത്തി കൊലപ്പെടുത്തുകയായിരുന്നുവെന്നാണ് അന്വേഷണത്തില്‍ വ്യക്തമായത്.
ഞായറാഴ്ച (നവംബര്‍ 1) ഉച്ചയോടെ അഭിരാമിന്റെ ഇന്‍സ്റ്റാഗ്രാം അക്കൗണ്ടിലേക്ക് പെണ്‍കുട്ടിയുടെ ഐഡിയില്‍നിന്ന് ഒരു സന്ദേശം എത്തുകയായിരുന്നു. അത്യാവശ്യമായി കാണണം എന്ന സന്ദേശം വിശ്വസിച്ച് വീട്ടില്‍നിന്നിറങ്ങിയ അഭിരാമിനെ പാങ്ങപ്പാറ ബസ് സ്റ്റോപ്പില്‍നിന്ന് പ്രതികള്‍ സമീപിക്കുകയും പേരൂര്‍ അങ്കണവാടിക്ക് സമീപമുള്ള ആളൊഴിഞ്ഞ വാഴത്തോട്ടത്തിലേക്ക് കൂട്ടിക്കൊണ്ടുപോവുകയും ചെയ്തു.
വാഴത്തോട്ടത്തില്‍ വച്ചുണ്ടായ വാഗ്വാദത്തിനൊടുവില്‍ പ്രതികള്‍ ബെല്‍റ്റ് ഉപയോഗിച്ച് അഭിരാമിന്റെ കഴുത്ത് ഞെരിച്ച് കൊലപ്പെടുത്തുകയായിരുന്നു. ശ്വാസംമുട്ടി വീണ് മരണം ഉറപ്പാക്കിയ ശേഷം മൃതദേഹം ചാക്കിലാക്കി തൊട്ടടുത്ത കാടുമൂടിയ പറമ്പിലെ താഴ്ചയിലേക്ക് തള്ളുകയും കരിയിലകള്‍ കൊണ്ട് മൂടുകയും ചെയ്തു. കൊലപാതകം വേറെവിടെയെങ്കിലും വച്ച് നടത്തിയ ശേഷം മൃതദേഹം ഇവിടെ ഉപേക്ഷിച്ചതാണോ എന്ന കാര്യത്തിലും പോലീസ് പരിശോധന നടത്തുന്നുണ്ട്.