ഇന്ന് സോഷ്യല് മീഡിയയില് കാണുന്നതെല്ലാം സത്യമാണെന്ന് വിശ്വസിച്ചാല് അക്കൗണ്ടിലെ പണം കാണാതാകാന് അധികം സമയം വേണ്ട. പണമുണ്ടാക്കാന് വഴികള് തിരയുന്നവരെ കുരുക്കാന് സൈബര് തട്ടിപ്പുകാര് ഇറക്കിയിരിക്കുന്നത് അതിവിദഗ്ദ്ധമായ തന്ത്രങ്ങളാണ്. ഇതാ, കേന്ദ്ര ധനമന്ത്രി നിര്മല സീതാരാമന്റെ വ്യാജ എഐ (AI) വിഡിയോ പ്രചരിപ്പിച്ച് ഒരു വനിതാ ഡോക്ടറില് നിന്നും തട്ടിയെടുത്തത് 67 ലക്ഷം രൂപ! കൊച്ചി കുമ്പളം സ്വദേശിയായ ഡോക്ടറെ വിശ്വസിപ്പിച്ച് പണം കവര്ന്ന കേസില് കണ്ണൂര് സ്വദേശികളായ രണ്ട് യുവാക്കളെ പനങ്ങാട് പൊലീസ് പിടികൂടിയിരിക്കുകയാണ്.
ഫേസ്ബുക്കില് കണ്ട ഒരു പരസ്യമാണ് ഡോക്ടറെ ചതിക്കുഴിയിലേക്ക് നയിച്ചത്. നിക്ഷേപിക്കുന്ന തുക മൂന്നു മാസം കൊണ്ട് മൂന്നിരട്ടിയാക്കാം എന്ന വാഗ്ദാനം വിശ്വസിച്ച് ഡോക്ടര് അതിലെ ലിങ്കില് പ്രവേശിച്ചു. ‘ക്ലയിന്റ് 9 Pro’ എന്ന കമ്പനിയുടെ വെബ്സൈറ്റിലെത്തി, അവര് ആവശ്യപ്പെട്ട പ്രകാരം ട്രേഡിംഗിനായി പലതവണയായി പണമയച്ചു നല്കി. മാത്രമല്ല, കണ്ണൂര് കേന്ദ്രീകരിച്ച് പ്രവര്ത്തിക്കുന്ന ‘ഡിജിറ്റ് കോം ഐടി സൊല്യൂഷന്സ്’ എന്ന കമ്പനിയുടെ അക്കൗണ്ടിലേക്കും ഇവര് പണം അയച്ചു. ജനുവരി മുതല് മാര്ച്ച് വരെ നീണ്ട ഈ കാലയളവില് ഏകദേശം 67 ലക്ഷം രൂപയാണ് ഡോക്ടറുടെ അക്കൗണ്ടുകളില് നിന്നും അപ്രത്യക്ഷമായത്. വാഗ്ദാനം ചെയ്ത ലാഭമോ മുടക്കിയ മുതലോ തിരികെ ലഭിക്കാതെ വന്നപ്പോഴാണ് താന് വഞ്ചിക്കപ്പെട്ടെന്ന് ഡോക്ടര് തിരിച്ചറിയുന്നത്.
ഡോക്ടറുടെ പരാതിയുടെ അടിസ്ഥാനത്തില് പനങ്ങാട് പൊലീസ് നടത്തിയ അന്വേഷണത്തില് കണ്ണൂര് കൂത്തുപ്പറമ്പ് സ്വദേശികളായ അബ്ദുല് റഹ്മാന് (35), അര്ഷാദ് (38) എന്നിവര് പിടിയിലായി. തട്ടിപ്പ് കമ്പനിയായ ഡിജിറ്റ് കോം ഐടി സൊല്യൂഷന്സിന്റെ ഉടമകളാണ് ഇവര്. കേരളത്തിന് പുറമേ കര്ണാടക, മിസോറാം തുടങ്ങിയ സംസ്ഥാനങ്ങളിലും ഇവര്ക്കെതിരെ സമാനമായ തട്ടിപ്പ് കേസുകളുണ്ടെന്ന് മരട് ഇന്സ്പെക്ടര് അബ്ദുല് മനാഫ് വ്യക്തമാക്കി. ഈ സംഘത്തിലെ ഉത്തരേന്ത്യക്കാരായ മൂന്നുപേര് ഇതിനകം തന്നെ ഹരിയാന, തീഹാര് ജയിലുകളില് റിമാന്ഡിലാണെന്നും പൊലീസ് അറിയിച്ചു.