ഫേസ്ബുക്ക്, ഇന്സ്റ്റാഗ്രാം, വാട്ട്സ്ആപ്പ് തുടങ്ങിയ സോഷ്യല് മീഡിയ പ്ലാറ്റ്ഫോമുകളെ ഏകോപിപ്പിക്കുന്നതിന്റെ ഭാഗമായി പുതിയ സബ്സ്ക്രിപ്ഷന് പദ്ധതികള് പരീക്ഷിക്കാന് ഒരുങ്ങുകയാണ് മെറ്റ. ‘മെറ്റാ വണ്’ എന്ന ഏകീകൃത പ്ലാറ്റ്ഫോമിന് കീഴില് ഈ സേവനങ്ങള് കൊണ്ടുവരാനാണ് കമ്പനിയുടെ നീക്കം. വാട്ട്സ്ആപ്പിന്റെ ആന്ഡ്രോയിഡ് പതിപ്പില് മെറ്റാ വണ് സബ്സ്ക്രിപ്ഷന് ഉള്പ്പെടുത്താനുള്ള പ്രവര്ത്തനങ്ങള് ഇതിനകം ആരംഭിച്ചതായാണ് റിപ്പോര്ട്ടുകള്.
വാബീറ്റ ഇന്ഫോയുടെ റിപ്പോര്ട്ടുകള് പ്രകാരം, വാട്ട്സ്ആപ്പ് ബീറ്റാ ഫോര് ആന്ഡ്രോയിഡ് പതിപ്പില് ‘മെറ്റാ വണ് പ്ലസ്’, ‘മെറ്റാ വണ് പ്രീമിയം’ എന്നീ രണ്ട് പ്ലാനുകളുടെ സൂചനകള് കണ്ടെത്തിയിട്ടുണ്ട്. ഭാവിയില് ഉപയോക്താക്കള്ക്ക് വാട്ട്സ്ആപ്പില് നിന്നുതന്നെ ഈ സബ്സ്ക്രിപ്ഷന് പ്ലാനുകള് തിരഞ്ഞെടുക്കാനും നിയന്ത്രിക്കാനും സാധിക്കും.
പദ്ധതികളുടെ വിവരങ്ങള് ഇങ്ങനെ
മെറ്റാ വണ് പ്ലസ്: പ്രതിമാസം ഏകദേശം 6.99 യൂറോ (ഏകദേശം 700 രൂപ) ആയിരിക്കും ഈ പ്ലാനിന്റെ നിരക്ക്. വാട്ട്സ്ആപ്പ് പ്ലസ് ആനുകൂല്യങ്ങള്ക്ക് പുറമെ മെറ്റയുടെ എഐ അധിഷ്ഠിത ചിത്ര-വീഡിയോ സൃഷ്ടി ടൂളുകളിലേക്ക് കൂടുതല് പ്രവേശനം ഇതിലൂടെ ലഭിക്കും.
മെറ്റാ വണ് പ്രീമിയം: പ്രതിമാസം 20.99 യൂറോ (ഏകദേശം 2,200 രൂപ) നിരക്കിലുള്ള ഈ പ്ലാനില് ഒരു മാസത്തെ സൗജന്യ ട്രയല് ലഭ്യമാകാന് സാധ്യതയുണ്ട്. പ്ലസ് പ്ലാനിലെ ഫീച്ചറുകള്ക്ക് പുറമെ കൂടുതല് ശക്തമായ എഐ ശേഷികള്, സങ്കീര്ണ്ണമായ ചോദ്യങ്ങള്ക്ക് മെച്ചപ്പെട്ട പ്രതികരണങ്ങള്, കൂടുതല് ഇമേജ്-വീഡിയോ ജനറേഷന് പരിധി തുടങ്ങിയവയും ഇതില് ഉള്പ്പെടും.
രണ്ട് പ്ലാനുകളിലും വാട്ട്സ്ആപ്പ് പ്ലസ് സൗകര്യങ്ങള് ലഭ്യമാകുമെന്നാണ് പ്രതീക്ഷിക്കുന്നത്. പുതിയ തീമുകള്, കസ്റ്റം റിങ്ടോണുകള്, കൂടുതല് പിന് ചെയ്ത ചാറ്റുകള്, ലിസ്റ്റ് കസ്റ്റമൈസേഷന്, പ്രീമിയം സ്റ്റിക്കറുകള് തുടങ്ങി ഉപയോക്തൃ അനുഭവം മെച്ചപ്പെടുത്തുന്ന ഫീച്ചറുകള് ഇതിന്റെ ഭാഗമായി വരും.
എങ്കിലും, ഈ വിവരങ്ങള് മെറ്റയുടെ ഔദ്യോഗിക പ്രഖ്യാപനമല്ല. ബീറ്റാ പതിപ്പില് കണ്ടെത്തിയ സൂചനകളുടെ അടിസ്ഥാനത്തില് മാത്രമുള്ള റിപ്പോര്ട്ടുകളാണിത്. അതിനാല്, പ്ലാനുകളുടെ വിലയിലോ സവിശേഷതകളിലോ ഭാവിയില് മാറ്റങ്ങള് വരാന് സാധ്യതയുണ്ട്. മെറ്റാ വണ് സേവനം നിലവില് വന്നാല് കമ്പനിയുടെ വിവിധ പ്ലാറ്റ്ഫോമുകളിലെ പ്രീമിയം സേവനങ്ങള് ഒരൊറ്റ സബ്സ്ക്രിപ്ഷനിലൂടെ ഉപയോക്താക്കള്ക്ക് ആസ്വദിക്കാന് സാധിക്കും.