രാജപുരം: വിദ്യാര്ഥികളില് പ്രകൃതിയോടും കൃഷിയോടുമുള്ള ആഭിമുഖ്യം വളര്ത്തുകയെന്ന ലക്ഷ്യത്തോടെ രാജപുരം സെന്റ് പയസ് ടെന്ത് കോളേജ് എന്എസ്എസ് യൂണിറ്റിന്റെ ആഭിമുഖ്യത്തില് കോളേജ് ക്യാമ്പസില് കപ്പകൃഷി ആരംഭിച്ചു. പുതിയ തലമുറയ്ക്ക് കൃഷിയറിവുകള് പകര്ന്നു നല്കാനും മണ്ണിലേക്ക് ഇറങ്ങി പ്രവര്ത്തിക്കാന് അവരെ പ്രേരിപ്പിക്കാനുമാണ് എന്എസ്എസ് യൂണിറ്റ് ഈ മാതൃകാപരമായ പദ്ധതിക്ക് തുടക്കമിട്ടത്.
കോളേജ് മാനേജറും കോട്ടയം അതിരൂപത സഹായമെത്രാനുമായ മാര് ജോസഫ് പണ്ടാരശ്ശേരില് ക്യാമ്പസില് കപ്പത്തൈ നട്ടുകൊണ്ട് കൃഷിയുടെ ഔദ്യോഗിക ഉദ്ഘാടനം നിര്വ്വഹിച്ചു. പഠനത്തോടൊപ്പം തന്നെ വിദ്യാര്ഥികള് കാര്ഷിക സംസ്കാരത്തിന്റെ ഭാഗമാകേണ്ടതിന്റെ പ്രാധാന്യം അദ്ദേഹം ചടങ്ങില് ഓര്മ്മിപ്പിച്ചു. സെന്റ് പയസ് കോളേജ് പ്രോ മാനേജര് ഫാ. ജോയി കട്ടിയാങ്കല്, പ്രിന്സിപ്പാള് ഡോ. ബിജു ജോസഫ്, ബര്സാര് ഫാ. ജോബിന് പ്ലാച്ചേരിപ്പുറത്ത് എന്നിവര് ചടങ്ങില് സാന്നിധ്യമറിയിക്കുകയും കാര്ഷിക മുന്നേറ്റത്തിന് ആശംസകള് നേരുകയും ചെയ്തു.
ക്യാമ്പസിലെ കാര്ഷിക പദ്ധതികള്ക്ക് എന്എസ്എസ് പ്രോഗ്രാം ഓഫീസര്മാരായ അതുല്യ കുര്യാക്കോസ്, ഡോ. അഖില് തോമസ് എന്നിവരും വിദ്യാര്ത്ഥി പ്രതിനിധികളായ സി. ദേവിക, പ്രകീര്ത്ത് രാജ് മോഹന്, കെ. ആനന്ദ്, എ.പി. അഭിജിത്ത് എന്നിവരും നേതൃത്വം നല്കി. വരും ദിവസങ്ങളില് കൂടുതല് കാര്ഷിക പദ്ധതികളിലേക്ക് ക്യാമ്പസിനെ നയിക്കാനാണ് എന്എസ്എസ് യൂണിറ്റിന്റെ തീരുമാനം.