താപനില ഉയരുന്നതിനൊപ്പം കടല്വെള്ളത്തിലെ ഓക്സിജന്റെ അളവ് കുറയുന്നത് മത്സ്യസമ്പത്തിനെ സാരമായി ബാധിച്ചിരിക്കുകയാണ്
ആലപ്പുഴ: സംസ്ഥാനത്ത് വേനല് കടുത്തതോടെ തീരക്കടലില് മത്സ്യലഭ്യത വന്തോതില് കുറയുന്നു. താപനില ഉയരുന്നതിനൊപ്പം കടല്വെള്ളത്തിലെ ഓക്സിജന്റെ അളവ് കുറയുന്നത് മത്സ്യസമ്പത്തിനെ സാരമായി ബാധിച്ചിരിക്കുകയാണ്. തീരക്കടലില് സാധാരണയായി ലഭിക്കാറുള്ള മത്തി, അയല, കിളിമീന് തുടങ്ങിയ ഉപരിതല മത്സ്യങ്ങളാണ് ഇപ്പോള് വലകളില് കുടുങ്ങാത്തത്. ഇതോടെ വിപണിയില് മീന് വില കുത്തനെ ഉയര്ന്നു.
പ്രതിസന്ധിക്ക് പിന്നിലെ കാരണങ്ങള്
സാധാരണ വേനല്ക്കാലങ്ങളില് മത്സ്യലഭ്യതയില് നേരിയ കുറവുണ്ടാകാറുണ്ടെങ്കിലും ഇത്തവണ സ്ഥിതി അതീവ ഗുരുതരമാണെന്ന് വിദഗ്ധര് ചൂണ്ടിക്കാട്ടുന്നു. കുഫോസ് വൈസ് ചാന്സലര് പ്രഫ. എ. ബിജുകുമാറിന്റെ നിരീക്ഷണപ്രകാരം, ചൂട് കൂടുന്നത് തീരക്കടലിനെയാണ് ആദ്യം ബാധിക്കുന്നത്. തന്മൂലം തണുപ്പുള്ള സാഹചര്യം തേടി മത്സ്യങ്ങള് ആഴക്കടലിലേക്ക് കുടിയേറുകയാണ്.