കൊച്ചി: പ്രായപൂര്ത്തിയാകാത്ത പെണ്കുട്ടിയെ പ്രണയം നടിച്ച് ലൈംഗികമായി പീഡിപ്പിച്ച കേസില് ഓണ്ലൈന് ടാക്സി ഡ്രൈവര് അറസ്റ്റില്. വയനാട് സ്വദേശിയായ നൗഷാദ് (30) ആണ് പാലാരിവട്ടം പോലീസിന്റെ പിടിയിലായത്. സമൂഹമാധ്യമങ്ങളിലൂടെ പരിചയപ്പെട്ട് പ്രായപൂര്ത്തിയാകാത്ത കുട്ടികളെ ചൂഷണം ചെയ്യുന്ന സംഭവങ്ങള് വര്ധിച്ചുവരുന്ന സാഹചര്യത്തിലാണ് ഈ അറസ്റ്റ്.
പഠനത്തില് പിന്നോട്ട് പോയതിനെ തുടര്ന്ന് രക്ഷിതാക്കള് പെണ്കുട്ടിയുടെ ഫോണ് വിളികള് നിരീക്ഷിച്ചപ്പോഴാണ് സംഭവം പുറത്തറിയുന്നത്. ചോദ്യം ചെയ്യലില് വിവാഹിതനായ നൗഷാദുമായി പ്രണയത്തിലാണെന്ന് പെണ്കുട്ടി വെളിപ്പെടുത്തി. തുടര്ന്ന് രക്ഷിതാക്കള് പോലീസില് വിവരമറിയിച്ചു. പെണ്കുട്ടിയുടെ മൊഴിയെടുത്ത പോലീസ് പോക്സോ നിയമം ഉള്പ്പെടെയുള്ള വകുപ്പുകള് ചുമത്തി നൗഷാദിനെതിരെ കേസെടുക്കുകയായിരുന്നു. എ.സി.പി പി. രാജ്കുമാറിന്റെ നിര്ദ്ദേശപ്രകാരം പാലാരിവട്ടം എസ്.എച്ച്.ഒ കെ.ആര്. രൂപേഷിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.