തിരുവനന്തപുരം: കെസിഎ സംഘടിപ്പിക്കുന്ന പിങ്ക് ടി 20 ചലഞ്ചേഴ്സ് വനിതാ ക്രിക്കറ്റ് ടൂര്ണ്ണമെന്റില് തുടര്ച്ചയായ മൂന്നാം വിജയവുമായി സാഫയര് ടീം. പേള്സിനെ അഞ്ച് റണ്സിനാണ് സാഫയര് തോല്പിച്ചത്. മറ്റൊരു മല്സരത്തില് എമറാള്ഡ് അഞ്ച് വിക്കറ്റിന് റൂബിയെ തോല്പിച്ചു
ബാറ്റിങ് നിര പരാജയപ്പെട്ടതോടെ തുടര്ച്ചയായ നാലാം മല്സരത്തിലും തോല്വി വഴങ്ങുകയായിരുന്നു റൂബി. ആദ്യം ബാറ്റ് ചെയ്ത റൂബീസിന് 20 ഓവറില് ഏഴ് വിക്കറ്റിന് 86 റണ്സ് മാത്രമാണ് നേടാനായത്. 25 റണ്സെടുത്ത ഓപ്പണര് അഷിമ ആന്റണിയും 24 റണ്സെടുത്ത വിക്കറ്റ് കീപ്പര് എം അബിനയും മാത്രമാണ് റൂബി ബാറ്റിങ് നിരയില് തിളങ്ങിയത്. എമറാള്ഡിന് വേണ്ടി നിയതി മഹേഷ് മൂന്നും അനുഷ്ക സി വി രണ്ടും വിക്കറ്റുകള് വീഴ്ത്തി. മറുപടി ബാറ്റിങ്ങിന് ഇറങ്ങിയ എമറാള്ഡ് 19 പന്തുകള് ബാക്കി നില്ക്കെ ലക്ഷ്യത്തിലെത്തി. 23 റണ്സെടുത്ത ക്യാപ്റ്റന് നജ്ല നൌഷാദാണ് എമറാള്ഡിന്റെ ടോപ് സ്കോറര്.
രണ്ടാം മല്സരത്തില് പേള്സിനെതിരെ അഞ്ച് റണ്സിനായിരുന്നു സാഫയറിന്റെ വിജയം. അവസാന ഓവര് വരെ ആവേശം നിറഞ്ഞ് നിന്ന മല്സരത്തിനൊടുവിലായിരുന്നു സാഫയര് ജയിച്ചു കയറിയത്. ആദ്യം ബാറ്റ് ചെയ്ത സാഫയര് 20 ഓവറില് അഞ്ച് വിക്കറ്റ് നഷ്ടത്തില് 110 റണ്സെടുത്തു. 66 റണ്സെടുത്ത ക്യാപ്റ്റന് അക്ഷയ സദാനന്ദനാണ് സാഫയറിന് ഭേദപ്പെട്ട സ്കോര് സമ്മാനിച്ചത്. 51 പന്തുകളില് നാല് ഫോറും നാല് സിക്സും അടങ്ങുന്നതായിരുന്നു അക്ഷയയുടെ ഇന്നിങ്സ്. മറുപടി ബാറ്റിങ്ങിന് ഇറങ്ങിയ പേള്സ് ബാറ്റിങ് നിരയില് 39 റണ്സുമായി പുറത്താകാതെ നിന്ന ആര്യനന്ദ മാത്രമാണ് മികച്ച പ്രകടനം കാഴ്ച വച്ചത്. ഒരറ്റത്ത് ഉറച്ച് നിന്ന ആര്യനന്ദ അവസാന ഓവര് വരെ പേള്സിന് പ്രതീക്ഷ നല്കി. എന്നാല് മറുവശം തകര്ന്നടിഞ്ഞതോടെ പേള്സ് 19.5 ഓവറില് 105 റണ്സിന് ഓള് ഔട്ടായി. സാഫയറിന് വേണ്ടി പവിത്ര ആര് നായര് മൂന്ന് വിക്കറ്റ് വീഴ്ത്തി. വിജയത്തോടെ എമറാള്ഡ് നാല് പോയിന്റുമായിപട്ടികയില് രണ്ടാം സ്ഥാനത്തെത്തി. ആറ് പോയിന്റുള്ള സാഫയറാണ് ഒന്നാം സ്ഥാനത്തുള്ളത്.