ആറാട്ടണ്ണന് എന്നറിയപ്പെടുന്ന സന്തോഷ് വര്ക്കിക്ക് സ്ത്രീത്വത്തെ അപമാനിച്ച കേസില് ജാമ്യം. ചലച്ചിത്ര അഭിനേത്രിമാരെ അപമാനിക്കുന്ന പ്രസ്താവനയില് രജിസ്റ്റര് ചെയ്ത കേസിലാണ് ജാമ്യം അനുവദിച്ചത്. ഹൈക്കോടതിയുടെ അവധിക്കാല സിംഗിള് ബെഞ്ചാണ് ജാമ്യം നല്കിയത്. എന്നാല് സന്തോഷ് വര്ക്കിക്കെതിരെ പ്രഥമദൃഷ്ട്യാ കുറ്റം നിലനില്ക്കുമെന്നും ഹൈക്കോടതി നിരീക്ഷിച്ചു. ഇയാളെ കസ്റ്റഡിയിലെടുത്തുള്ള ചോദ്യം ചെയ്യല് അനിവാര്യമല്ലെന്നും കോടതി പറഞ്ഞു.
സമാന കുറ്റകൃത്യം ആവര്ത്തിക്കരുതെന്ന് സന്തോഷ് വര്ക്കിക്ക് കോടതി കര്ശന മുന്നറിയിപ്പ് നല്കി. സാമൂഹിക മാധ്യമങ്ങളിലൂടെ സ്ത്രീത്വത്തെ അപമാനിച്ച് പ്രസ്താവന നടത്തരുതെന്നും കോടതി താക്കീത് നല്കി. നടിമാരായ ഉഷാ ഹസീന, കുക്കു പരമേശ്വരന്, ഡബ്ബിംഗ് ആര്ട്ടിസ്റ്റ് ഭാഗ്യലക്ഷ്മി തുടങ്ങിയവരാണ് സന്തോഷ് വര്ക്കിക്കെതിരെ പരാതി സമര്പ്പിച്ചിരുന്നത്. നിരന്തരം സ്ത്രീകള്ക്ക് എതിരെ അശ്ലീല പരാമര്ശം നടത്തുന്ന സന്തോഷ് വര്ക്കിക്ക് എതിരെ അധികൃതര് കര്ശന നടപടി സ്വീകരിക്കണമെന്ന് ചൂണ്ടിക്കാട്ടി നടി ഉഷ ഹസീന ആലപ്പുഴ ഡിവൈഎസ്പിക്ക് പരാതി സമര്പ്പിക്കുകയായിരുന്നു.