കോട്ടയം:സംസ്ഥാന ടൂറിസം വകുപ്പ് സംഘടിപ്പിക്കുന്ന ചുണ്ടന്‍ വള്ളങ്ങളുടെ ഐപിഎല്‍ മാതൃകയിലുള്ള ചാമ്പ്യന്‍സ് ബോട്ട് ലീഗ് (സി.ബി.എല്‍.) ആറാം സീസണിന്റെ കോട്ടയം താഴത്തങ്ങാടിയില്‍ നടന്ന ഏഴാം മത്സരത്തില്‍ കൊല്ലം അരോമ ബോട്ട് ക്ലബ് തുഴഞ്ഞ അരോമ ചുണ്ടന്‍ (3.21.227 മിനിറ്റ്) വിജയികളായി. പള്ളാത്തുരുത്തി ബോട്ട് ക്ലബ് തുഴഞ്ഞ മേല്‍പ്പാടം ചുണ്ടന്‍ രണ്ടാമതും(3.21. 802 മിനിറ്റ്) നിരണം ബോട്ട് ക്ലബ് തുഴഞ്ഞ നിരണം ചുണ്ടന്‍(3.21.925 മിനിറ്റ്) മൂന്നാമതും ഫിനിഷ് ചെയ്തു.
ജലവിഭവ വകുപ്പ് മന്ത്രി മോന്‍സ് ജോസഫ് അധ്യക്ഷനായിരുന്ന ചടങ്ങില്‍ നിയമസഭാ സ്പൂീക്കര്‍ തിരുവഞ്ചൂര്‍ രാധാകൃഷ്ണന്‍ മത്സരങ്ങള്‍ ഉദ്ഘാടനം ചെയ്തു. സിവില്‍ സപ്ലൈസ് മന്ത്രി അനൂപ് ജേക്കബ് പിറവത്തെ മത്സരങ്ങള്‍ ഉദ്ഘാടനം ചെയ്തു. കോട്ടയം എം പി കെ ഫ്രാന്‍സിസ് ജോര്‍ജ്ജ് മത്സരങ്ങള്‍ ഫ്‌ലാഗ് ഓഫ് ചെയ്തു. കോട്ടയം നഗരസഭാ ചെയര്‍മാന്‍ എം പി സന്തോഷ് കുമാര്‍, വൈസ് ചെയര്‍മാന്‍ ഷീബ പുന്നന്‍ വിവിധ തദ്ദേശസ്വയംഭരണ സ്ഥാപന അംഗങ്ങള്‍, ടൂറിസം വകുപ്പ് ഉന്നത ഉദ്യോഗസ്ഥര്‍, സിബിഎല്‍ സാങ്കേതിക സമിതി അംഗങ്ങള്‍ തുടങ്ങിയവര്‍ ഉദ്ഘാടന ചടങ്ങില്‍ സംബന്ധിച്ചു.
താഴത്തങ്ങാടിയിലെ നെട്ടായത്തില്‍ സ്റ്റാര്‍ട്ടിംഗ് പോയിന്റിന് ശേഷമുള്ള വളവ് ചുണ്ടന്‍ വള്ളങ്ങള്‍ക്ക് എന്നും വെല്ലുവിളിയായിരുന്നു. ഫൈനലില്‍ തുടക്കത്തില്‍ ലീഡ് നേടുന്ന ശീലം അരോമ വിട്ടില്ല. എന്നാല്‍ താഴത്തങ്ങാടി പാലം കടന്നപ്പോള്‍ മേല്‍പ്പാടം അല്‍പം മുന്നിലെത്തി. എന്നാല്‍ അവസാന 100 മീറ്ററില്‍ അരോമ ചുണ്ടന്‍ മികച്ച തുഴവേഗത്തിലൂടെ ഒന്നാമതെത്തി. ഹീറ്റ്‌സ് മത്സരങ്ങളിലെ മികച്ച സമയം കണക്കിലെടുത്ത് മേല്‍പ്പാടം ചുണ്ടന്‍, അരോമ ചുണ്ടന്‍, നിരണം ചുണ്ടന്‍ എന്നിവയാണ് ഫൈനലിനെത്തിയത്. താഴത്തങ്ങാടിയിലേത് സിബിഎല്‍ വേദികളിലെ ഏറ്റവും വീതി കുറഞ്ഞ നെട്ടായമായതിനാല്‍ മത്സരം അടുത്തു കാണാന്‍ വന്‍ ജനാവലിയാണ് എത്തിച്ചേര്‍ന്നത്.
ആറാം സീസണില്‍ പിബിസി മേല്‍പ്പാടത്തിന്റെ തുടര്‍ച്ചയായ നാലാം വിജയത്തിനു ശേഷമാണ് അവര്‍ തോല്‍വിയറിയുന്നത്. ആദ്യ രണ്ട് മത്സരത്തില്‍ ഒന്നാമതെത്തിയ അരോമ താഴത്തങ്ങാടിയിലൂടെ മികച്ച തിരിച്ചു വരവാണ് നടത്തിയത്.
പട്ടികയില്‍ 64 പോയിന്റ് വീതം നേടി മേല്‍പാടവും അരോമയും ഒന്നാം സ്ഥാനം പങ്കിടുകയാണ്. 54 പോയിന്റുമായി വീയപുരം തൊട്ടടുത്ത സ്ഥാനത്തുണ്ട്. ഇരുട്ടുകുത്തി, വെപ്പ് വള്ളങ്ങളുടെ പ്രാദേശിക മത്സരങ്ങളും ഇതോടനുബന്ധിച്ച് നടന്നു.
താഴത്തങ്ങാടിയിലെ മത്സരഫലം-
അരോമ ചുണ്ടന്‍- (അരോമ ബോട്ട് ക്ലബ്ബ്, പരവൂര്‍, കൊല്ലം) ഒന്ന്, മേല്‍പ്പാടം ചുണ്ടന്‍- (പള്ളാത്തുരുത്തി ബോട്ട് ക്ലബ്ബ്) രണ്ട്, നിരണം ചുണ്ടന്‍- (നിരണം ബോട്ട് ക്ലബ്ബ്, നിരണം) മൂന്ന്,
വീയപുരം ചുണ്ടന്‍-(യുബിസികൈനകരി എഫ് സി) നാല്, ചെറുതന ചുണ്ടന്‍- (എന്‍ബിസി നാട്ടകം ബോട്ട് ക്ലബ്ബ്) അഞ്ച്, ആര്‍പ്പൂക്കര ചുണ്ടന്‍- (ഇമ്മാനുവല്‍ ബോട്ട് ക്ലബ്ബ്, കുമരകം) ആറ്, പുണ്യാളന്‍ നിരണം- (കുമരകം ടൗണ്‍ ബോട്ട് ക്ലബ്ബ്,കുമരകം) ഏഴ്, നടുഭാഗം ചുണ്ടന്‍- (പി.ബി.സി. പുന്നമട എന്‍സിഎഫ് സി ബോട്ട് ക്ലബ്ബ്) എട്ട്, തലവടി ചുണ്ടന്‍- (വില്ലേജ് ബോട്ട് ക്ലബ്ബ്)ഒമ്പത്.
ഫൈനലടക്കം ആകെ 11 മത്സരങ്ങളുള്ള ഈ സീസണിലെ മറ്റ് ലീഗ് പോരാട്ടങ്ങള്‍- ആലപ്പുഴ പുളിങ്കുന്ന് (ഒക്ടോബര്‍ 31), കൈനകരി (നവംബര്‍ 7), കായംകുളം (നവംബര്‍ 14) എന്നിവിടങ്ങളിലായി നടക്കും. നവംബര്‍ 21-ന് കൊല്ലത്ത് നടക്കുന്ന പ്രസിഡന്റ്‌സ് ട്രോഫി വള്ളംകളിയോടെയാണ് സിബിഎല്‍ ആറാം സീസണിന് സമാപനമാവുന്നത്.
ഓരോ മത്സരവേദികളിലും വിജയികളാകുന്നവരില്‍ ഒന്നാം സ്ഥാനക്കാര്‍ക്ക് അഞ്ച് ലക്ഷം രൂപയും രണ്ടാം സ്ഥാനക്കാര്‍ക്ക് മൂന്ന് ലക്ഷവും മൂന്നാം സ്ഥാനക്കാര്‍ക്ക് ഒരു ലക്ഷം രൂപയും ലഭിക്കും. ബോണസായി ഓരോ ടീമിനും നാല് ലക്ഷം രൂപ വീതവും നീക്കിവച്ചിട്ടുണ്ട്. ചാമ്പ്യന്‍ഷിപ്പില്‍ ഒന്നാം സ്ഥാനം കരസ്ഥമാക്കുന്ന ക്ലബിന് 25 ലക്ഷവും രണ്ടാം സ്ഥാനം നേടുന്നവര്‍ക്ക് 15 ലക്ഷവും മൂന്നാം സ്ഥാനത്തെത്തുന്ന ക്ലബിന് 10 ലക്ഷം രൂപയും സമ്മാനമായി ലഭിക്കും.