തിരുവനന്തപുരം: എന്‍ഡോസള്‍ഫാന്‍ ദുരിത ബാധിതരുടെ പുനരധിവാസ പ്രവര്‍ത്തനങ്ങള്‍ കൂടുതല്‍ ശക്തിപ്പെടുത്തുന്നതിനായി കാസര്‍കോട് ജില്ലയില്‍ പ്രവര്‍ത്തിക്കുന്ന എന്‍ഡോസള്‍ഫാന്‍ സെല്‍ പുനഃസംഘടിപ്പിക്കുമെന്ന് സാമൂഹ്യനീതി വകുപ്പ് മന്ത്രി വി.ഇ. അബ്ദുല്‍ ഗഫൂര്‍ നിയമസഭയില്‍ അറിയിച്ചു. ഭിന്നശേഷിക്കാര്‍ക്ക് മെഡിക്കല്‍ സര്‍ട്ടിഫിക്കറ്റ് ലഭ്യമാക്കുന്നതിനായി വിവിധ ജില്ലകളില്‍ പ്രത്യേക മെഡിക്കല്‍ ക്യാമ്പുകള്‍ സംഘടിപ്പിക്കുന്ന കാര്യവും പരിഗണനയിലുണ്ടെന്ന് മന്ത്രി വ്യക്തമാക്കി. കല്ലട്ര മാഹിന്‍ എം.എല്‍.എ നിയമസഭയില്‍ ഉന്നയിച്ച ചോദ്യങ്ങള്‍ക്കുള്ള മറുപടിയിലാണ് മന്ത്രി ഇക്കാര്യങ്ങള്‍ അറിയിച്ചത്.
എന്‍ഡോസള്‍ഫാന്‍ ദുരിതത്തിന്റെ ദീര്‍ഘകാല പ്രത്യാഘാതങ്ങള്‍ അനുഭവിക്കുന്ന നിരവധി കുടുംബങ്ങള്‍ കാസര്‍കോട് ജില്ലയിലുണ്ട്. ഇവരുടെ ചികിത്സ, പുനരധിവാസം, സാമൂഹിക സുരക്ഷ, കുടുംബക്ഷേമം തുടങ്ങിയ മേഖലകളില്‍ കൂടുതല്‍ കാര്യക്ഷമമായ ഇടപെടലുകള്‍ ഉറപ്പാക്കേണ്ടതുണ്ട്. എന്‍ഡോസള്‍ഫാന്‍ സെല്‍ പുനഃസംഘടിപ്പിക്കുന്നതിലൂടെ ദുരിതബാധിതര്‍ക്കും കുടുംബങ്ങള്‍ക്കും അര്‍ഹമായ ആനുകൂല്യങ്ങളും സഹായങ്ങളും സമയബന്ധിതമായി ലഭ്യമാക്കുന്നതിനുള്ള ഏകോപനം ശക്തിപ്പെടുത്താനാകും.
ഭിന്നശേഷിക്കാര്‍ക്ക് മെഡിക്കല്‍ സര്‍ട്ടിഫിക്കറ്റ് ലഭിക്കുന്നതിനുള്ള നടപടിക്രമങ്ങള്‍ ലളിതമാക്കുന്നതിനും അനാവശ്യ കാലതാമസം ഒഴിവാക്കുന്നതിനുമാണ് വിവിധ ജില്ലകളില്‍ പ്രത്യേക മെഡിക്കല്‍ ക്യാമ്പുകള്‍ സംഘടിപ്പിക്കുന്നത് പരിഗണിക്കുന്നത്. സര്‍ട്ടിഫിക്കറ്റിനായി ദീര്‍ഘദൂരം യാത്ര ചെയ്യേണ്ടിവരുന്നതുള്‍പ്പെടെയുള്ള ബുദ്ധിമുട്ടുകള്‍ കുറയ്ക്കാനും അര്‍ഹരായവര്‍ക്ക് സമയബന്ധിതമായി സര്‍ട്ടിഫിക്കറ്റ് ലഭ്യമാക്കാനും ക്യാമ്പുകള്‍ സഹായകരമാകും.
ദുരിതബാധിതരുടെയും ഭിന്നശേഷിക്കാരുടെയും പ്രയാസങ്ങള്‍ നിയമസഭയില്‍ ഉന്നയിച്ചതിലൂടെ ഈ വിഷയങ്ങളില്‍ സര്‍ക്കാരിന്റെ ശ്രദ്ധ ഉറപ്പാക്കാന്‍ കല്ലട്ര മാഹിന്‍ എം.എല്‍.എയുടെ ഇടപെടലിന് കഴിഞ്ഞു.