നൈറ്റ് ഷിഫ്റ്റ് സ്റ്റുഡിയോസും വൈ നോട്ട് സ്റ്റുഡിയോസും ചേര്ന്ന് നിര്മ്മിക്കുന്ന പ്രണവ് മോഹന്ലാല് – രാഹുല് സദാശിവന് ചിത്രം ‘ഡീയസ് ഈറേ’യുടെ റിലീസ് ട്രെയിലര് അണിയറപ്രവര്ത്തകര് പുറത്തിറങ്ങി. ഒക്ടോബര് 31-ന് ചിത്രം ആഗോളതലത്തില് റിലീസിനെത്തും. ചിത്രത്തിന്റെ രണ്ടാമത്തെ ട്രെയിലറാണ് ഇപ്പോള് പ്രേക്ഷകരിലേക്ക് എത്തിയിരിക്കുന്നത്.
രാഹുല് സദാശിവന് തന്നെ തിരക്കഥയെഴുതി സംവിധാനം ചെയ്യുന്ന ഈ ഹൊറര് ത്രില്ലര് ചിത്രം നിര്മ്മിക്കുന്നത് ചക്രവര്ത്തി രാമചന്ദ്ര, എസ്. ശശികാന്ത് എന്നിവര് ചേര്ന്നാണ്. ‘ക്രോധത്തിന്റെ ദിനം’ എന്ന അര്ത്ഥം വരുന്ന ‘ദി ഡേ ഓഫ് റാത്ത്’ എന്ന ടാഗ് ലൈനോടെയാണ് ചിത്രം എത്തുന്നത്. പ്രേക്ഷക-നിരൂപക പ്രശംസ നേടിയ ‘ഭ്രമയുഗം’ എന്ന ചിത്രത്തിന് ശേഷം രാഹുല് സദാശിവന് – നൈറ്റ് ഷിഫ്റ്റ് സ്റ്റുഡിയോസ് ടീം വീണ്ടും ഒന്നിക്കുന്ന ചിത്രം കൂടിയാണിത്.
ആദ്യ ട്രെയിലര് നല്കിയ പ്രതീക്ഷകള് വര്ധിപ്പിക്കുന്ന രീതിയിലാണ് ഈ റിലീസ് ട്രെയിലറും ഒരുക്കിയിരിക്കുന്നത്. ഉദ്വേഗവും ആകാംഷയും മിസ്റ്ററിയും നിറഞ്ഞ ഒരു ഹൊറര് ത്രില്ലറാകും ചിത്രമെന്ന സൂചന ട്രെയിലര് നല്കുന്നു. നിലവാരമുള്ള ദൃശ്യങ്ങളും ഗംഭീര സംഗീതവും കോര്ത്തിണക്കി വമ്പന് സാങ്കേതിക നിലവാരത്തിലാണ് ചിത്രം ഒരുക്കിയിരിക്കുന്നത്. സെന്സറിംഗ് പൂര്ത്തിയായപ്പോള് ‘A’ സര്ട്ടിഫിക്കറ്റ് ലഭിച്ച ‘ഡീയസ് ഈറേ’യുടെ റിലീസിനായി സിനിമാപ്രേമികള് ഏറെ ആവേശത്തോടെ കാത്തിരിക്കുകയാണ്. ക്രിസ്റ്റോ സേവ്യര് ഈണമിട്ട ചിത്രത്തിലെ ‘ക്രോധത്തിന്റെ ദിനം’ എന്ന ഗാനവും വലിയ പ്രേക്ഷകശ്രദ്ധ നേടിയിരുന്നു.